දැනට අපරාධ පරීක්ෂණ දෙපාර්තමේන්තු (CID) භාරයේ රඳවා සිටින විශ්රාමික මේජර් ජෙනරාල්
සුරේෂ් සලේ ගේ ශාරීරික හා මානසික සෞඛ්ය තත්ත්වය අතිශය බිඳවැටීමකට ලක්ව ඇති බැවින්, ඔහුව වහාම රෝහල්ගත කිරීමට පියවර ගන්නා ලෙස දැනුම් දෙමින් ඔහුගේ නීතිඥ මඬුල්ල විසින් CID අධ්යක්ෂ ශානි අබේසේකර වෙත නිල නීතිමය ලිපියක් (Formal Notice) යොමු කර තිබේ.
ශ්රේෂ්ඨාධිකරණ නීතිඥ අසිත් සිරිවර්ධන විසින් යොමු කරන ලද මෙම ලිපිය මඟින් පෙන්වා දෙන්නේ, දීර්ඝකාලීන රැඳවුම් කොන්දේසි හමුවේ හිටපු බුද්ධි ප්රධානී සුරේෂ් සලේ මේ වන විට ආහාර, ජලය සහ වෛද්ය ප්රතිකාර ප්රතික්ෂේප කරමින් සිටින බවයි. ස්වාධීන නිලධාරීන්ගේ සහය නොමැතිව ඇවිදීමට පවා නොහැකි තත්ත්වයක පසුවන තම සේවාදායකයාගේ ජීවිතයට පැහැදිලි ආසන්න මරණීය අවදානමක් පවතින බවත්, ඔහු සිය අවසාන කැමැත්ත ප්රකාශ කිරීමට සූදානම් වන බවත් නීතිඥවරයා අවධාරණය කරයි.
රාජ්ය භාරයේ සිටින පුද්ගලයෙකුගේ ජීවිතය ආරක්ෂා කිරීමේ පැවරිය නොහැකි වගකීම (Duty of Care) රජය සතු වන බැවින්, මෙම හදිසි අවස්ථාවේදී ක්රියා කිරීමට අසමත් වුවහොත් සිදුවන ඕනෑම අනතුරක පෞද්ගලික හා ආයතනික වගකීම බලධාරීන් විසින් දැරිය යුතු බව ද එමඟින් දන්වා ඇත.
CID අධ්යක්ෂවරයා වෙත යොමු කළ එම සම්පූර්ණ ලිපියේ සිංහල පරිවර්තනය පහතින් පළ වේ.
ශානි අබේසේකර මහතා,
අධ්යක්ෂ,
අපරාධ පරීක්ෂණ දෙපාර්තමේන්තුව,
කොළඹ 01.
රඳවා සිටින විශ්රාමික මේජර් ජෙනරාල් සුරේෂ් සලේ මහතා වෙනුවෙන් වහාම වෛද්යමය මැදිහත් වීමක් සිදු කරන ලෙස සහ රෝහල්ගත කරන ලෙසට කෙරෙන හදිසි ඉල්ලීම.
විශ්රාමික මේජර් ජෙනරාල් සුරේෂ් සලේ මහතාගේ බිරිඳ, පුත්රයා සහ සහෝදරයා විසින් අද දින සිදු කරන ලද පවුලේ රැඳවියන් බැලීමේ හමුවකින් අනතුරුව, ඔහුගේ නීතිඥවරයා වශයෙන් මම මෙම ලිපිය ලියා දන්වමි.
සලේ මහතාගේ ශාරීරික තත්ත්වය අතිශයින්ම බියකරු සහ අසාධ්ය මට්ටමකට පිරිහී ඇති බව පවුලේ සාමාජිකයන් නිරීක්ෂණය කර ඇත. නිලධාරීන් දෙදෙනෙකුගේ ශාරීරික සහය නොමැතිව එම හමුවීමට පැමිණීමට පවා ඔහුට නොහැකි වී ඇති බව වාර්තා වේ. මෙම හමුවීමේදී ඔහු තම පවුලේ සාමාජිකයන්ට දන්වා ඇත්තේ තමන් ඖෂධ, සේලයින්, ආහාර සහ ජලය ලබා ගැනීම සන්නද්ධව ප්රතික්ෂේප කර ඇති බවයි. තවද, තම මරණය ආසන්න බව විශ්වාස කරන බව ප්රකාශ කර ඇති ඔහු, මරණයෙන් පසු ඇස් දන් දීම සඳහා අවශ්ය කටයුතු සූදානම් කරන ලෙස ඉල්ලා ඇත. තම අවසාන කැමැත්ත (Last Will) සහ ඒ හා සබැඳි අනෙකුත් නීතිමය ලේඛන සකස් කර අත්සන් කිරීමේ අරමුණින් වහාම තම නීතිඥවරයාට පැමිණෙන ලෙසද ඔහු ඉල්ලා තිබේ.
මෙම ප්රකාශයන් සහ පවත්නා තත්ත්වයන් මඟින් ඔහුගේ ශාරීරික හා මානසික තත්ත්වයේ බරපතළ බිඳ වැටීමක් පෙන්නුම් කරයි. තමන්ගේ සුභසාධනය, සෞඛ්යය සහ ජීවිතය රැක ගැනීම සම්බන්ධයෙන් තාර්කික තීරණ ගැනීමට ඔහුට තවදුරටත් හැකියාවක් නොමැති බව මින් පැහැදිලි වේ. ඔහු දැනට රඳවා තබාගෙන සිටින දීර්ඝකාලීන තත්ත්වයන්, අවම වශයෙන්, ඔහුගේ ජීවිතයට සෘජු හා ක්ෂණික අවදානමක් ඇති කර තිබේ.
රජය සතු භාරයේ (Custody) සිටින සෑම පුද්ගලයෙකු කෙරෙහිම පැවරිය නොහැකි සත්කාරක වගකීමක් (Non-delegable duty of care) රාජ්යය සතු වේ. පුද්ගලයෙකුගේ නිදහස අහිමි කළ පසු, එම පුද්ගලයාගේ ජීවිතය, සෞඛ්යය සහ යහපැවැත්ම ආරක්ෂා කිරීමේ වගකීම සෘජුවම පැවරෙන්නේ එම පුද්ගලයා කෙරෙහි පාලනය ක්රියාත්මක කරන බලධාරීන්ට ය. පැහැදිලිව පෙනෙන සහ ආසන්න වෛද්ය හදිසි අවස්ථාවකදී එම වගකීම පැහැර හැරීම අතිශය බරපතළ නීතිමය කරුණකි.
සලේ මහතාට සුදුසුකම් ලත් ස්වාධීන වෛද්ය වෘත්තිකයන්ගේ වහාම වෛද්යමය මැදිහත් වීමක් අවශ්ය වන බවත්, පූර්ණ වෛද්ය ඇගයීමක් සහ ප්රතිකාර ලබා දීමට හැකියාව ඇති සුදුසු රෝහල් පහසුකමකට ඔහුව වහාම මාරු කළ යුතු බවත් මෙයින් ඔබට නිල වශයෙන් දැනුම් දෙනු ලැබේ. ඔහුගේ මෙම අවදානම් සහගත තත්ත්වය පිළිබඳව පැහැදිලිව දැනුවත්ව සිටියදීත්, ඒ සඳහා ක්රියා කිරීම ප්රමාද කිරීම, ප්රතික්ෂේප කිරීම හෝ අසමත් වීම ශ්රී ලංකාවේ අපරාධ සහ සිවිල් නීතිය යටතේ පුද්ගලික සහ ආයතනික වගකීමකට (Liability) හේතු විය හැක.
මෙම පැහැදිලි අනතුරු ඇඟවීම නොතකා, වත්මන් තත්ත්වය යටතේ පසුවෙද්දී ජෙනරාල් සලේ මහතාට ආපසු හැරවිය නොහැකි තුවාලයක් හෝ මරණයක් සිදු වුවහොත්, එම හැසිරීම ජීවිතයට ඇති විය හැකි සහ කලින් අපේක්ෂා කළ හැකි අවදානමක් හිතාමතාම නොසලකා හැරීමක් ද යන්න විභාග කිරීමට අදාළ බලධාරීන්ට, අධිකරණවලට සහ විමර්ශන ආයතනවලට ඉඩ ප්රස්ථාව විවෘත වනු ඇත. ඔහුගේ අඛණ්ඩ රැඳවුම් භාරය සහ වෛද්ය ප්රතිකාර සම්බන්ධයෙන් තීරණ ගැනීමට වගකිව යුතු අය, තමන්ගේ ක්රියාවන් සහ පැහැර හැරීම් (Actions and omissions) වෙනුවෙන් පෞද්ගලිකව වගකීමට බැඳී සිටිනු ඇත.
ඒ අනුව, මම පහත සඳහන් දෑ දැඩිව ඉල්ලා සිටිමි.
1. සල්ලේ මහතා හදිසි වෛද්ය ප්රතිකාර ලබා දීම සඳහා අවශ්ය පහසුකම් සහිත රජයේ හෝ පෞද්ගලික රෝහලක් වෙත වහාම මාරු කර යැවීම;
2. අවශ්ය නම් මනෝ වෛද්ය විශේෂඥයන් ද ඇතුළුව, ස්වාධීන වෛද්ය විශේෂඥයන් ලවා ඔහුව වහාම පරීක්ෂාවට ලක් කිරීම;
3. ඔහුගේ නීතිමය නියෝජිතයන්ට සහ පවුලේ අයට ඔහු වෙත පැමිණීමට සාධාරණ ප්රවේශයක් ලබා දීම;
4. ඔහුගේ වෛද්ය තත්ත්වය සහ ඔහුගේ ආරක්ෂාව වෙනුවෙන් ගෙන ඇති පියවර පිළිබඳ ලිඛිත වාර්තාවක් ප්රමාදයකින් තොරව ලබා දීම.
මෙම ලිපිය විධිමත් නිල නිවේදනයක් (Formal notice) වේ. මෙහි දක්වා ඇති තත්ත්වයන් දැන සිටියදීත් ක්රියා කිරීමට තවදුරටත් අසමත් වීම, මගේ සේවාදායකයාට සිදුවන යම් හානියක් හේතුවෙන් අනාගතයේදී පැවැත්වෙන ඕනෑම අධිකරණ, අපරාධ, ආණ්ඩුක්රම ව්යවස්ථාපිත හෝ ජාත්යන්තර ක්රියාමාර්ගවලදී සාක්ෂි වශයෙන් උපයෝගී කරගනු ඇත.
මෙයට,
විශ්වාසී,
අසිත් සිරිවර්ධන
ශ්රේෂ්ඨාධිකරණ නීතිඥ
විශ්රාමික මේජර් ජෙනරාල් සුරේෂ් සල්ලේ මහතාගේ නීතිඥ අනුශාසක.
07.06.2026
