SLBFE Ahu Wennaepa W 1400 H 80 Gif Animation 10sec

SLBFE Ahu Wennaepa W 1400 H 80 Gif Animation 10sec

වධහිංසා චෝදනා පිළිබඳ අවසාන තීරණය අධිකරණයට පවරයි!

 

 

පාස්කු ඉරිදා ප්‍රහාරය සම්බන්ධ විමර්ශනවලට අදාළව ත්‍රස්තවාදය වැළැක්වීමේ පනත යටතේ

රඳවා සිටින රාජ්‍ය බුද්ධි සේවයේ හිටපු අධ්‍යක්ෂ, විශ්‍රාමික මේජර් ජෙනරාල් සුරේෂ් සලේගේ මානසික තත්ත්වය සහ රැඳවුම් භාරයේදී සිදු වූ බව කියන සැලකීම් පිළිබඳ නව විශේෂඥ මණ්ඩල වාර්තාව කොළඹ කොටුව මහේස්ත්‍රාත් අධිකරණය හමුවට ඉදිරිපත් කර තිබේ. අංක 35882/24 දරන නඩුවට අදාළව ඉදිරිපත් කර ඇති මෙම වාර්තාවේ 2026 නොවැම්බර් 20 වැනි දින අධිකරණ මුද්‍රාව සටහන්ව ඇත.

 

 

සුරේෂ් සලේට බරපතළ හිංසනයක් සිදුව ඇති බවට සහ ඔහුගේ රෝගී තත්ත්වයන් පිළිබඳව මීට පෙර විශේෂඥ කමිටුවක් විසින් ඉදිරිපත් කර තිබූ වාර්තාව සම්බන්ධයෙන් අධිකරණය හමුවේ මතු වූ කරුණු සලකා බැලීමෙන් අනතුරුව පත් කරන ලද නව කමිටුව විසින් මෙම තක්සේරු වාර්තාව සකස් කර තිබේ.

 

වසර 38ක පමණ යුද හමුදා සේවයක් සහ හමුදා බුද්ධි අංශයේ ඉහළ තනතුරු හෙබවූ සුරේෂ් සලේ 2026 පෙබරවාරි 25 වැනිදා අත්අඩංගුවට ගෙන රඳවා තබා ගැනීමෙන් අනතුරුව, රැඳවුම් තත්ත්වයන්, චෝදනා එල්ල වන ආක්‍රමණශීලී ශරීර පරීක්ෂාව සහ විමර්ශනයේදී සිදු වූ බවට ඔහු දකින අසාධාරණකම් පිළිබඳව පැමිණිලි කර ඇත. ඒ සමඟ ඔහුගේ මානසික පීඩනය ඉහළ ගොස් උපවාසයක නිරත වීමෙන් පසු 2026 ජූනි 7 වැනිදා රෝහල්ගත කර ඇති බව වාර්තාවේ පසුබිම් කරුණු ලෙස දැක්වේ.

 

නව විශේෂඥ මණ්ඩලය සිය වෛද්‍ය නිගමන ඉදිරිපත් කිරීමට පෙරම මූලික සීමාවක් සලකුණු කරමින් අවධාරණය කරන්නේ, වාර්තා වූ සිදුවීම් විස්තර කර ඇති ආකාරයටම සිදු වූයේද, අදාළ ශරීර පරීක්ෂාවට නෛතික අනුමැතියක් තිබුණේද හෝ එම තත්ත්වයන් වධහිංසා ගණයට වැටේද යන්න මනෝ වෛද්‍ය මතයකින් පමණක් ස්වාධීනව තීරණය කළ නොහැකි බවයි.

 

එම සීමාව තුළ රැඳෙමින් සායනික තත්ත්වය විග්‍රහ කරන මණ්ඩලය, රැඳවුම් කාලය සහ රෝහල්ගතව සිටි කාලය තුළ සුරේෂ් සලේ කාංසාව, විෂාද ලක්ෂණ සහ වරින් වර මතු වූ මරණය හා සියදිවි නසාගැනීම පිළිබඳ සිතුවිලි සහිත සැලකිය යුතු මානසික පීඩාවක් අත්විඳ ඇති බව සඳහන් කරයි. මූලිකව ඔහුගේ තත්ත්වය අත්අඩංගුවට ගැනීම, රඳවා තබා ගැනීම සහ පුළුල් නෛතික හා පෞද්ගලික තත්ත්වයන්ට ප්‍රතිචාර ලෙස ඇති වූ 'අනුගත වීමේ ආබාධයකට' (Adjustment disorder) අනුකූල වී ඇත.

 

පසුව ඔහුගේ මානසික තත්ත්වය පිරිහී මෘදු හෝ මධ්‍යස්ථ විෂාද තත්ත්වයක (Mild-to-moderate depressive episode) රෝග විනිශ්චය සීමාවට ළඟා වී තිබිය හැකි වුවද, එය විෂාද තත්ත්වයක්ද නැතහොත් අනුගත වීමේ ආබාධය තීව්‍ර වීමක්ද යන්න නිශ්චිතව තහවුරු කිරීමට පවතින සාක්ෂි ප්‍රමාණවත් නොවන බව මණ්ඩලය පෙන්වා දෙයි. කෙසේ වෙතත්, ඔහු දරුණු විෂාද තත්ත්වයකට පත් වූ බවට හෝ කිසිදු අවස්ථාවක පශ්චාත් ව්‍යසන ක්ලමථ ආබාධය (PTSD) හෝ උග්‍ර ආතති ආබාධය සඳහා වන රෝග විනිශ්චය නිර්ණායක සපුරා ඇති බවට සාක්ෂි නොමැති බව වාර්තාවේ දැක්වේ.

 

මණ්ඩලය විසින් පරීක්ෂණ සිදු කරන අවස්ථාව වන විට, ඉතිරි වී තිබූ සුළු කාංසා සහ විෂාද ලක්ෂණ හැරෙන්නට ඔහු පවතින කිසිදු මානසික රෝගයක් සඳහා වන නිර්ණායක සපුරා නොතිබූ බවද එහි සටහන් කර තිබේ. ඔහු නිරත වූ උපවාසය සැලකිය යුතු විරෝධතා අරමුණකින් යුක්ත වූ බව පෙන්වා දෙන මණ්ඩලය, සියදිවි නසාගැනීමේ සිතුවිලි සහ ඇතැම් අවස්ථාවල මරණය පිළිගැනීමට සූදානමක් දක්නට ලැබුණද, සිය ජීවිතය හානි කර ගැනීම ඔහුගේ ප්‍රධාන හෝ එකම අරමුණ වූ බව පවතින සාක්ෂිවලින් තහවුරු නොවන බව සඳහන් කරයි.

 

 

මානසික පීඩනයට බලපෑ හේතු සාධක ඉස්තාන්බුල් ප්‍රොටෝකෝලයට (Istanbul Protocol) අනුකූලව විග්‍රහ කිරීමේදී, චෝදනා එල්ල වන ශරීර පරීක්ෂාව සහ රැඳවුම් තත්ත්වයන් ලැජ්ජාව, කෝපය සහ ආත්ම ගරුත්වයට හානි වීම හරහා ඔහුගේ පීඩනයට දායක වන්නට ඇති බව මණ්ඩලය පිළිගනී. එහෙත් එම මානසික සොයාගැනීම් අදාළ සිදුවීම්වලටම විශේෂිත වූ ඒවා නොවන අතර, පවතින අපරාධ විමර්ශනය, නෛතික ක්‍රියාමාර්ග පිළිබඳ අවිනිශ්චිතතාව, කීර්තිනාමය සහ පවුල පිළිබඳ කනස්සල්ල ඊට සාපේක්ෂව වඩාත් ප්‍රබල ලෙස බලපා ඇති බව වාර්තාවේ දැක්වේ. ඊට අමතරව ඔහුගේ ශාරීරික රෝගී තත්ත්වය, දීර්ඝ නිරාහාරව සිටීම සහ පෝෂණ ඌනතාවන් ද රෝග ලක්ෂණ කෙරෙහි බලපා තිබිය හැකි බැවින්, එක් එක් සිදුවීමේ තනි හේතුකාරක දායකත්වය නිශ්චිතව තීරණය කළ නොහැකි බව මණ්ඩලය නිගමනය කරයි.

 

 

වධහිංසා සහ කෲර, අමානුෂික හෝ අවමන් සහගත සැලකීම් පිළිබඳ මතය දක්වන 1288 වැනි වගන්තියේදී, රඳවා තබා ගැනීමේ තත්ත්වයන් සහ චෝදනා එල්ල වන ශරීර පරීක්ෂාව මණ්ඩලය විසින් වෙන වෙනම සලකා බලා තිබේ. සමස්තයක් ලෙස රඳවා තබා ගැනීමේ තත්ත්වයන් සුරේෂ් සලේගේ සුබසාධනය සහ මානව ගරුත්වය පිළිබඳ ගැටලු මතු කරන අතර, එය අවමන් සහගත හෝ වෙනත් අයහපත් සැලකීමක් වී තිබිය හැකි බව වාර්තාවේ සඳහන් වේ.

 

කෙසේ වෙතත්, එම තත්ත්වයන්ගේ නිශ්චිත පසුබිම, කාලසීමාව සහ බරපතළකම මෙන්ම ඒවා හිතාමතා ගත් තීරණ නිසාද නැතහොත් මෙහෙයුම් හා සම්පත් සීමාවන් නිසා ඇති වූවාද යන්න තීරණය කිරීමට පවතින සාක්ෂි ප්‍රමාණවත් නොවන බව මණ්ඩලය දක්වා ඇත.

 

 

චෝදනා එල්ල වන ශරීර පරීක්ෂාව සම්බන්ධ 1289 වැනි වගන්තියේ සඳහන් වන්නේ, පවතින තොරතුරු මගින් සුරේෂ් සලේගේ කොට කලිසම හෝ දිග කලිසම පහතට දැමූ බවට පිටුබලය සපයන බවයි. එය බලහත්කාරයෙන් නිරුවත් කිරීමේ අත්දැකීමකට අනුකූල වන බැවින්, තත්ත්වයන් අනුව වධහිංසාවක් හෝ වෙනත් අයහපත් සැලකීමක් විය හැකි බව මණ්ඩලය පවසයි. එහෙත් ශරීරය නිරාවරණය වූ ප්‍රමාණය, තවදුරටත් ශාරීරික මැදිහත්වීමක් සිදු වූයේද යන්න සහ එම ක්‍රියාවලියේ සම්පූර්ණ පසුබිම හා අරමුණ අවිනිශ්චිතව පවතින බවද එහි දැක්වේ.

 

 

සිද්ධියට සම්බන්ධ නිලධාරීන්ගේ සහ අනෙකුත් රැඳවියන්ගේ ප්‍රකාශ, සීසීටීවී (CCTV) දර්ශන සහ අදාළ මෙහෙයුම් වාර්තා මණ්ඩලය හමුවේ නොතිබීම සිය තක්සේරුව තවදුරටත් සීමා කළ බව වාර්තාව අනාවරණය කරයි. ඒ අනුව, මෙම අත්දැකීම් වධහිංසා හෝ කෲර, අමානුෂික, අවමන් සහගත සැලකීමක් හෝ දඬුවමක් වේද යන්න පිළිබඳ අවසාන කරුණුමය සහ නෛතික තීරණය ගරු අධිකරණය වෙත පවරන බව 1290 වැනි වගන්තියෙන් ප්‍රකාශ කර ඇත.

 

වාර්තාවේ අවසන් කොටසින් සුරේෂ් සලේ වෙනුවෙන් අඛණ්ඩ මනෝ වෛද්‍ය පසු විපරම් නිර්දේශ කර තිබේ. ආහාර හෝ වෛද්‍ය ප්‍රතිකාර ප්‍රතික්ෂේප කිරීම මගින් මරණය පිළිගැනීමට ඇති සූදානමක් යළි ප්‍රකාශ කළහොත්, විධිමත් සහ ලේඛනගත සියදිවි නසාගැනීමේ අවදානම් තක්සේරුවක් සහ ආරක්ෂිත පියවර ගත යුතු බව එහි සඳහන්ය. එමෙන්ම, ඔහුගේ HOCM හෘද රෝග තත්ත්වය සැලකිල්ලට ගනිමින් ඕනෑම ඖෂධීය ප්‍රතිකාරයක් සමකාලීන සායනික සොයාගැනීම් මත පදනම්ව අදාළ විශේෂඥ වෛද්‍යවරුන් සමඟ සම්බන්ධීකරණයෙන් සිදු කළ යුතු බවත්, රඳවා තබා ගැනීම, මාරු කිරීම හෝ නිදහස් කිරීම පිළිබඳ තීරණවලදී නෛතික හා ආරක්ෂක අවශ්‍යතා සමඟ මනෝවිද්‍යාත්මක බලපෑම් ද සලකා බැලිය යුතු බවත් නිර්දේශ කර ඇත.

 

අවසාන නිර්දේශය වන 1294 වැනි වගන්තිය මගින් මණ්ඩලය පෙන්වා දී ඇත්තේ, වාර්තා වූ රඳවා තබා ගැනීමේ තත්ත්වයන් සහ චෝදනා එල්ල වන ආක්‍රමණශීලී ශරීර පරීක්ෂාව පිළිබඳ සත්‍ය තත්ත්වයන් සහ නෛතික වර්ගීකරණය තහවුරු කර ගැනීම සඳහා සුදුසු බලධාරීන් විසින් වෙනම විමර්ශනයක් සිදු කිරීම යෝග්‍ය විය හැකි බවයි.

 

 

මෙම නව වාර්තාව මගින් අධිකරණය සහ අදාළ ආයතන හමුවේ ප්‍රධාන පැතිකඩ දෙකක් සලකුණු කර තිබේ. එක් අතකින්, මනෝ වෛද්‍ය සාක්ෂිවල විද්‍යාත්මක සීමාවන් තුළ රැඳෙමින් PTSD හෝ දරුණු විෂාදය වැනි රෝග විනිශ්චයන් බැහැර කර ඇති මණ්ඩලය, අවසාන නෛතික තීන්දුව අධිකරණයට පවරා ඇත. අනෙක් අතින්, මෙහෙයුම් වාර්තා, සීසීටීවී දර්ශන සහ සාක්ෂිකරුවන්ගේ ප්‍රකාශ මණ්ඩලය හමුවේ නොතිබීම තක්සේරුවට බාධාවක් වූ බව සඳහන් කරමින් වෙනම විමර්ශනයක් නිර්දේශ කිරීම හරහා, රැඳවුම් තත්ත්වයන් පිළිබඳ කරුණුමය සත්‍යය විධිමත් නෛතික යාන්ත්‍රණයක් ඔස්සේ තහවුරු කර ගැනීමේ අවශ්‍යතාව ඉස්මතු කර තිබේ.

 

 

මෙම ලිපිය කොළඹ කොටුව මහේස්ත්‍රාත් අධිකරණය හමුවට ඉදිරිපත් කර ඇති නව විශේෂඥ මණ්ඩල වාර්තාවේ අන්තර්ගත කරුණු පදනම් කරගනිමින් මහජන දැනුවත්භාවය උදෙසා සකස් කරන ලද්දකි. මෙම කරුණු මේ වන විට අධිකරණ ක්‍රියාවලියකට යටත්ව පවතින බැවින් සියලු කරුණුමය හා නෛතික තීරණ ගරු අධිකරණය සතු වන අතර, මෙහි සඳහන් ඕනෑම පාර්ශ්වයකට සිය පිළිතුරු දීමේ අයිතිය (Right of Reply) ඒ ආකාරයෙන්ම හිමි වේ.

 

 

නවතම ලිපි