'වැටුප් සාකච්ඡාව' අස්සෙන් එන විනිසුරු විශ්රාම වයස දිගු කිරීමේ සැඟවුණු න්යායපත්රය
ජනාධිපති අනුර කුමාර දිසානායක සහ අධිකරණ නිලධාරින්ගේ සංගමය අතර අද (ජුනි 1) පස්වරුවේ
ජනාධිපති කාර්යාලයේදී විශේෂ සාකච්ඡාවක් පැවැත්වීමට නියමිතව තිබේ. නිල වශයෙන් මෙම හමුව කැඳවා ඇත්තේ විනිසුරුවරුන්ගේ වැටුප් සහ දීමනා ඇතුළු වෘත්තීය ගැටලු සාකච්ඡා කිරීම සඳහා වුවද, ඊට මුවා වී ඉහළ අධිකරණ විනිසුරුවරුන්ගේ විශ්රාම යාමේ වයස දීර්ඝ කිරීමේ ආන්දෝලනාත්මක යෝජනාවක් කරළියට ගෙන ඒමේ සූදානමක් පවතින බව 'අනිද්දා' පුවත්පත ඇතුළු විශ්වාසවන්ත ආරංචි මාර්ග තහවුරු කරයි.
මෙම තීරණාත්මක සාකච්ඡාව සඳහා අධිකරණ නිලධාරින්ගේ සංගමය නියෝජනය කරමින් එහි සභාපති, කොටුව මහේස්ත්රාත් පසන් අමරසේන ඇතුළු නිලධාරීහු පිරිසක් සහභාගි වෙති. මහාධිකරණ, දිසා අධිකරණ සහ මහේස්ත්රාත් අධිකරණවල විනිසුරුවරුන්ගේ ප්රධානතම වෘත්තීය සංවිධානය වන මෙම සංගමය සමග පැවැත්වෙන අද හමුවට අධිකරණ සේවා කොමිෂන් සභාවේ (JSC) ලේකම් ප්රසන්න ද අල්විස් ද සහභාගි වීමට නියමිතය.
අද පැවැත්වෙන මෙම රැස්වීමේ අවසාන භාගයේදී අගවිනිසුරු ඇතුළු ඉහළ අධිකරණ විනිසුරුවරුන්ගේ විශ්රාම යාමේ වයස දීර්ඝ කිරීමේ යෝජනාව ජනාධිපතිවරයා පාර්ශ්වයෙන් ඉදිරිපත් වනු ඇතැයි අපේක්ෂා කෙරේ.
මෙය "සියලුම විනිසුරුවරුන්ගේ විශ්රාම වයස දීර්ඝ කිරීමේ" යහපත් යෝජනාවක් ලෙස මතුපිටින් පෙන්වීමට උත්සාහ කළද, එහි සැබෑ අරමුණ වී ඇත්තේ වත්මන් අගවිනිසුරු ප්රීති පද්මන් සූරසේන තවත් වසර දෙකක් එම ධූරයේ රඳවා ගැනීම බව දේශපාලන සහ නීති ආරංචි මාර්ග පෙන්වා දෙයි.
මෙවැනි සේවා දිගුවක් නොලැබුණහොත්, වත්මන් අගවිනිසුරුවරයා එළඹෙන දෙසැම්බර් මාසයේදී නිත්යානුකූලව විශ්රාම යාමට නියමිතය.
කෙසේ වෙතත්, තමන්ට අවශ්ය විනිසුරුවරුන් තමන් කැමති කාලයක් ධූරයේ රඳවා ගැනීමට ජනාධිපතිවරයා සහ ආණ්ඩුව දරන මෙම උත්සාහයට වත්මන් නීතිය යටතේ කිසිදු ඉඩකඩක් නොමැත. ශ්රී ලංකා ආණ්ඩුක්රම ව්යවස්ථාවේ 107(5) ව්යවස්ථාවට අනුව, ශ්රේෂ්ඨාධිකරණයේ විනිසුරුවරයෙකුගේ විශ්රාම යාමේ වයස අවුරුදු 65ක් වන අතර, අභියාචනාධිකරණ විනිසුරුවරයෙකුගේ එම වයස අවුරුදු 63කි. මෙම වයස් සීමාවන් දිගු කිරීමට නම්, පාර්ලිමේන්තුවේ තුනෙන් දෙකක බහුතරයකින් සම්මත වන ආණ්ඩුක්රම ව්යවස්ථා සංශෝධනයක් අනිවාර්යයෙන්ම සිදු කළ යුතු වේ.
ආණ්ඩුක්රම ව්යවස්ථා සංශෝධනයකින් තොරව, හුදෙක් විධායක ජනාධිපතිවරයාගේ බලය යොදාගනිමින් හෝ ගැසට් නිවේදන හරහා මෙවැනි සේවා දිගුවක් ලබාදීමට උත්සාහ කළහොත්, එය සමස්ත අධිකරණ පද්ධතියේම කඩාවැටීමකට මුලපුරනු ඇත. නීති ප්රවීණයන් සහ අධිකරණ ක්ෂේත්රයේ ප්රවීණයන් දැඩිව පෙන්වා දෙන්නේ මෙය අධිකරණයේ ස්වාධීනත්වයට එල්ල කරන මාරාන්තික ප්රහාරයක් මෙන්ම, අතිශය නරක පූර්වාදර්ශයක් සපයන්නක් බවයි. විධායකය විසින් තමන්ට හිතවත් විනිසුරුවරුන්ට මෙලෙස වරප්රසාද ලබාදීම හරහා, අධිකරණය විධායකයේ අතකොළුවක් බවට පත්වන අතර යුක්තිය පසිඳලීමේ ක්රියාවලිය කෙරෙහි ජනතාවට ඇති විශ්වාසය සම්පූර්ණයෙන්ම බිඳවැටී යනු ඇත.
අධිකරණ ක්ෂේත්රය සහ විධායකය අතර මෙම ගැටුම්කාරී තත්ත්වය නිර්මාණය වන්නේ හුදකලාව නොවේ. මහාධිකරණය ඇතුළු පහළ අධිකරණවල විනිසුරුවරුන් පත්කිරීම, උසස් කිරීම සහ විනය පාලනය සිදුකරන අධිකරණ සේවා කොමිෂන් සභාවේ (JSC) සාමාජික තනතුරක් දීර්ඝ කාලයක් තිස්සේ හිස්ව පැවතිණි. ඒ සම්බන්ධයෙන් නීති ක්ෂේත්රයෙන් එල්ල වූ දැඩි විවේචන සහ බලපෑම් හමුවේ, ශ්රේෂ්ඨාධිකරණයේ ජ්යෙෂ්ඨතම විනිසුරු යසන්ත කෝදාගොඩ මහතා පසුගිය සතියේ එහි සාමාජිකයෙකු ලෙස පත් කිරීමට ජනාධිපතිවරයාට සිදුවිය. මෙම පසුබිම තුළ, නීතියේ ආධිපත්යය වෙනුවෙන් පෙනී සිටීමේ දැඩි ස්ථාවරයක මේ වන විටත් නීති ක්ෂේත්රය පසුවේ.
ඒ අනුව, වැටුප් හා දීමනා වැඩි කිරීමේ පොරොන්දුවක් හරහා මෙම ආන්දෝලනාත්මක 'සේවා දිගුවේ' යෝජනාවට අධිකරණ නිලධාරීන්ගේ එකඟතාව හෝ නිහඬතාව ලබා ගැනීමට අද පැවැත්වෙන සාකච්ඡාවේදී විධායකය උත්සාහ කරනු ඇත. එහෙත්, නීති ප්රජාවගේ දැඩි විරෝධය මධ්යයේ, අද දින ජනාධිපති කාර්යාලයේදී සිදුවන මෙම හමුව හුදු වෘත්තීය ගැටලු විසඳීමක් පමණක් නොව, ශ්රී ලංකාවේ ප්රජාතන්ත්රවාදයේ සහ අධිකරණයේ ස්වාධීනත්වයේ අනාගතය තීරණය කරන තීරණාත්මක සන්ධිස්ථානයක් වනු නොඅනුමානය.
