මුදල් අමාත්යාංශයේ සිදුවූ ඇමරිකානු ඩොලර් මිලියන 2.5ක සයිබර් සොරකම සහ ඒ පිළිබඳ විමර්ශන සඳහා
ඇමරිකානු මධ්යම විමර්ශන කාර්යාංශයේ (FBI) සහාය ලබා ගැනීමට උත්සාහ කරන බවට පළ වන වාර්තා සම්බන්ධයෙන් ඇමරිකා එක්සත් ජනපදය අදහස් දක්වා තිබේ. එහිදී ඔවුන් සඳහන් කළේ ශ්රී ලංකාව සමඟ පවතින නීතිය බලාත්මක කිරීමේ සහයෝගීතාව තමන් අගය කරන බවත්, නිසි රාජ්ය තාන්ත්රික හා නීතිමය මාර්ග හරහා ඉදිරිපත් කෙරෙන නිල සහාය ඉල්ලීම් සලකා බැලීමට සූදානම් බවත්ය.
මාධ්ය විමසීමකට ප්රතිචාර දක්වමින් ඇමරිකානු තානාපති කාර්යාල ප්රකාශකයෙකු පවසා තිබුණේ ඇමරිකානු රජයේ ආයතන සම්බන්ධ වන විදේශීය ගනුදෙනුවල විශ්වාසනීයත්වය සහ නිවැරදිභාවය පිළිබඳව එක්සත් ජනපදය දැඩි අවධානයක් යොමු කරන බවයි.
"අපි ශ්රී ලංකාව සමඟ පවතින නීතිය ක්රියාත්මක කිරීමේ හවුල්කාරිත්වය අගය කරනවා. සුදුසු රාජ්ය තාන්ත්රික හා නීතිය බලාත්මක කිරීමේ නාලිකා හරහා ඉදිරිපත් කරන නිල සහාය ඉල්ලීම් සලකා බැලීමට අපි සූදානම්. කෙසේ වෙතත්, ප්රතිපත්තියක් ලෙස, දැනට පවතින පරීක්ෂණ හෝ නීතිමය සහයෝගීතාවයේ නිශ්චිත තොරතුරු පිළිබඳව අපි අදහස් දක්වන්නේ නැහැ," යැයි එම ප්රකාශකයා වැඩිදුරටත් පැවසීය.
සයිබර් අපරාධකරුවන් මුදල් අමාත්යාංශයේ පරිගණක පද්ධතියට ඇතුළු වී සිදුකළ මෙම මංකොල්ලය හේතුවෙන් ශ්රී ලංකාවට ඇමරිකානු ඩොලර් මිලියන 2.5ක් අහිමි විය. එම මුදල ඕස්ට්රේලියාවට ගෙවීමට නියමිතව තිබූ ණය වාරිකයකි.
මීට අමතරව, ඇමරිකානු තැපැල් සේවයට (US Post) ගෙවීමට තිබූ මුදල් අතරින් ඩොලර් 625,000ක මුදලක් ද ශ්රී ලංකාවට අහිමි වී ඇත. තැපැල් දෙපාර්තමේන්තුව විසින් ඇමරිකානු තැපැල් සේවය (USPS) වෙත ප්රේෂණය කරන ලද මෙම ඩොලර් 625,000ක මුදල අතුරුදහන් වීම සම්බන්ධයෙන් අපරාධ පරීක්ෂණ දෙපාර්තමේන්තුව (CID) මේ වන විටත් විමර්ශනයක් ආරම්භ කර තිබේ.
මීට පෙර, පාස්කු ඉරිදා ප්රහාරය සම්බන්ධයෙන් මෙරට සිදුකළ විමර්ශන සඳහා ද FBI නිලධාරීන් සහාය ලබා දුන් අතර ඒ පිළිබඳ වාර්තාවක් ද ඉදිරිපත් කර තිබුණි.
