"ප්‍රශ්න කතා කරලා මදි - දැන් විසඳුම් හදමු!": මහාචාර්ය රොහාන් සමරජීවගෙන් ආර්ථිකයට නව මාවතක් - 'Reset Now' පළමු හමුව අද!

• "ලංකාව ඉන්දීය කොළනියක් වෙයිද? - රොහාන් සමරජීවගේ 'Reset Now' නවදිල්ලි ව්‍යාපෘතියක් ද?"

• "ටිල්වින්ලා ඉන්දියාවට ගියාට පස්සේ, රොහාන් ගෙනෙන 'ඉන්දීය යතුර': මේක ආර්ථික ගැලවීමක්ද? දේශපාලන උගුලක්ද?"
• "රට ගොඩගන්න යතුර ඉන්දියාවට බාරදෙමුද? - 'Reset Now' පිටුපස ඇති ඉන්දීය ඇජෙන්ඩා එක"
• "තරුණ පිපුරුම වළක්වන්න ලංකාව ඉන්දියාවේ ප්‍රාන්තයක් කළ යුතුද? 
• "ඉන්දියාවට ලියලා දෙන ලංකාව: 'Reset Now' අස්සේ තියෙන ඉන්දීය ඩීල් එක මොකක්ද?"

(ROHAN SAMARAJEEWA)

ආර්ථික අර්බුදය ගැන හුදු විලාප තැබීම පසෙකලා, ශ්‍රී ලංකාවේ ආර්ථික පුනරුදය උදෙසා ප්‍රායෝගික සහ විද්‍යාත්මක විසඳුම් සාකච්ඡා කෙරෙන තීරණාත්මක කඩඉමක් අද සනිටුහන් වේ. 'Reset Now' ව්‍යාපාරය විසින් සංවිධානය කරනු ලබන විසඳුම් කේන්ද්‍රීය සාකච්ඡා මාලාවේ පළමු පියවර අද (13 සිකුරාදා) සවස 4.00 ට කොළඹ 2, නිපොන් හෝටලයේදී පැවැත්වේ.

ප්‍රකට දේශපාලන සන්නිවේදක සහ ප්‍රතිපත්ති සම්පාදක මහාචාර්ය රොහාන් සමරජීව ගේ ප්‍රධානත්වයෙන් පැවැත්වෙන මෙම හමුවේ මූලික තේමාව වන්නේ "වේගවත් වර්ධනයකට යතුර: ඉන්දියාව" යන්නයි.

ඇයි දැන්ම "Reset" කළ යුත්තේ?

ලෝක බැංකු දත්ත හා සැසඳීමේදී පෙනී යන්නේ අප ඉදිරියේ ඇත්තේ අතිශය මන්දගාමී ආර්ථික වර්ධනයකි. එහෙත්, මහාචාර්ය සමරජීව පෙන්වා දෙන පරිදි 2022-2032 දශකය තුළ ශ්‍රී ලංකාව 'තරුණ ජනගහන පිපුරුමකට' (Youth Bulge) මුහුණ දෙමින් සිටී. ඉදිරි දස වසර තුළ ශ්‍රම බලකායට එක්වන දස ලක්ෂයක් වූ තරුණ තරුණියන්ට රැකියා හෝ ව්‍යවසායක අවස්ථා මෙම මන්දගාමී ආර්ථිකය තුළ උත්පාදනය කළ නොහැක. මෑතකදී බංග්ලාදේශයෙන් දිස්වූ "අතෘප්තිමත් තරුණ පරපුරේ" (Unsatisfied Youth) නැගී සිටීම අපට අනතුරු ඇඟවීමක් විය යුතුය.

එමෙන්ම ජනගහනයෙන් 1/5 ක්ව පවතින (ළඟදීම 1/4 ක් වන) වැඩිහිටි ප්‍රජාව රැකබලා ගැනීමට අවශ්‍ය සම්පත් සොයාගැනීමද බරපතල අභියෝගයකි.

විසඳුම ළඟම ඇත: දක්ෂිණ ඉන්දියාව සමග බද්ධ වීම

මෙම අභියෝග ජය ගැනීමට ඇති කෙටි කාලීන සහ ප්‍රායෝගිකම විසඳුම වන්නේ අසල්වැසි ඉන්දියාව, විශේෂයෙන්ම 11% ක දැවැන්ත ආර්ථික වර්ධනයක් පෙන්වන තමිල්නාඩු ප්‍රාන්තය ඇතුළු දක්ෂිණ ඉන්දියාව සමග ආර්ථිකව බද්ධ වීමයි. ට්‍රම්ප්ගේ වෙළඳ යුද්ධ (Trade War) මධ්‍යයේ වුවද 2025 අගභාගයේදී ඉන්දියාව සිය අපනයන 20% කින් ඉහළ නංවාගෙන ඇති පසුබිමක, එම ගෝලීය සැපයුම් දාමයට අපද සම්බන්ධ විය යුතුය.

මෙහිදී මහාචාර්යවරයා ප්‍රධාන පූර්ව කොන්දේසි දෙකක් අවධාරණය කරයි:

1. භෞතික යටිතල පහසුකම් සහ සන්ධීයත්වය (Connectivity):  ඉන්දියාවේ 'විතින්ජම්' (Vizhinjam) වරාය වේගයෙන් දියුණු වෙමින් පවතින විට, කොළඹ වරායේ අනාගතය සුරක්ෂිත කරගැනීමට නම් අප කඩිනම් විය යුතුය. ප්‍රවාහන වියදම් අඩු කර, බලශක්ති සැපයුම් (තෙල් නළ මාර්ග සහ විදුලි ග්‍රිඩ් සම්බන්ධතා) හරහා දෙරට යා කිරීම මගින් ලංකාවේ සමාගම්වලට ඉන්දියාව හරහා ලෝකයට විවෘත වීමට මග පෑදෙනු ඇත.
2. නීතිමය සහ ගිවිසුම්ගත ස්ථාවරත්වය: හුදු යටිතල පහසුකම්වලින් ඔබ්බට ගොස්, තීරු බදු බාධක ඉවත් කිරීමට සහ ව්‍යාපාරික අවිනිශ්චිතතා (Regulatory uncertainty) අවම කිරීමට ඉවහල් වන ශක්තිමත් ද්වීපාර්ශ්වික ගිවිසුම්වලට එළඹීම අත්‍යවශ්‍ය වේ.

මෙම හමුව හුදු දේශපාලන කතා සාප්පුවක් නොව මෙය රටේ අනාගතය වෙනුවෙන් තාර්කිකව සහ දත්ත මත පදනම්ව විසඳුම් සොයන බුද්ධිමය කතිකාවතක් බව 'Reset Now' සංවිධායක මණ්ඩලය පවසයි.

ස්ථානය: නිපොන් හෝටලය, කුමාරන් රත්නම් පාර, කොළඹ 02.

වේලාව: අද (13 සිකුරාදා) සවස 4.00 සිට 6.00 දක්වා. මාධ්‍ය: සිංහල සහ ඉංග්‍රීසි භාෂා මිශ්‍රව.