ශ්‍රී ලංකාවේ සෞඛ්‍ය පද්ධතිය මේ වනවිට මුහුණ දී සිටින බරපතල අර්බුදය රහසක් නොවේ.
විශේෂයෙන්ම, රජයේ රෝහල් මුදල්, කාර්ය මණ්ඩල සහ අත්‍යවශ්‍ය ඖෂධ හිඟයෙන් දැඩි ලෙස පීඩා විඳිමින් සිටී.
මෙම අර්බුදය තව තවත් උග්‍ර කරමින්, රටේ ප්‍රමුඛ පෙළේ රෝහලක් වන ශ්‍රී ජයවර්ධනපුර රෝහල මේ වනවිට දැඩි පරිහානියකට ලක්ව ඇති බවට තොරතුරු වාර්තා වේ. දිනකට 2,000කට ප්‍රතිකාර කළ රෝහලක, දැන් එම සංඛ්‍යාව 200 දක්වා අඩුවී ඇති අතර, පරිපාලන වියදම් පවා දරාගත නොහැකි තත්ත්වයකට පත්ව ඇත. රෝහල් පරිපාලනය යළි ස්ථාපිත කිරීම සඳහා අලුතින් පත්කළ අධ්‍යක්ෂවරයා විසින් හෙට (02) සියලු වෛද්‍යවරුන් කැඳවා හදිසි සාකච්ඡාවක් පැවැත්වීමට නියමිත බවද වාර්තා වේ.
අනුර-මෝදි ගිවිසුම් සහ ඉන්දීය "ආක්‍රමණය"
මෙවන් පසුබිමක, පසුගියදා ජනාධිපති අනුර දිසානායක සහ ඉන්දීය අගමැති නරේන්ද්‍ර මෝදි අතර අත්සන් කෙරුණු ගිවිසුම් පිළිබඳව විවිධ කතාබහක් මතුව ඇත. මෙම ගිවිසුම්වල අන්තර්ගතය නිල වශයෙන් හෙළිදරව් කර නොමැති වුවද, ශ්‍රී ලංකාවේ සෞඛ්‍ය ක්ෂේත්‍රය ඉන්දියාව විසින් "ආක්‍රමණය කිරීමේ" අවදානමක් සහ ශ්‍රී ජයවර්ධනපුර රෝහල වැනි ප්‍රධාන රෝහල් ඉන්දීය සමාගම්වල පාලනයට නතුවීමේ හැකියාවක් පිළිබඳව දැඩි කනස්සල්ලක් මතුව ඇත.
මේ තත්වය පිළිබඳව සැක සංකා තව තවත් තහවුරු කරමින් ඉන්දියාවේ නිල සංචාරයක නිරතව සිටින සෞඛ්‍ය හා ජනමාධ්‍ය අමාත්‍ය වෛද්‍ය නලින්ද ජයතිස්ස පසුගිය (28) දින ඉන්දීය රජයේ සෞඛ්‍ය හා පවුල් සුබසාධන අමාත්‍ය SHRI JAGAT PRAKASH NADDA සහ සෞඛ්‍ය හා පවුල් සුබසාධන රාජ්‍ය අමාත්‍යවරිය වන SMT. ANUPRIYA PATEL හමුවී දෙරට සෞඛ්‍ය සේවාවන් පිළිබඳ සුහඳ පිළිසඳරක නිරත ව තිබුණි.
මෙහිදී මෙරට
ප්‍රාථමික සෞඛ්‍ය පද්ධතිය ශක්තිමත් කිරීම,
ඖෂධ සැපයීමේ වැඩපිළිවෙළ,
සෞඛ්‍ය පද්ධතිය ඩිජිටල්කරණ වැඩපිළිවෙළ සහ
නවීන තාක්ෂණික උපකරණ සෞඛ්‍ය සේවාව සඳහා ලබා ගැනීම
යන ප්‍රධාන කරුණු පිළිබඳව දෙරටේ සෞඛ්‍ය අමාත්‍යවරු දීර්ඝව සාකච්ඡා කළ බවත් දැනගන්නට ලැබිණි.
ආදායම් අර්බුදය සහ පෞද්ගලීකරණය
ශ්‍රී ජයවර්ධනපුර රෝහල ඇතුළු ප්‍රධාන ශික්ෂණ රෝහල් කිහිපයක් මේ වනවිට දැඩි ආදායම් අර්බුදයකට මුහුණ දී සිටී. තම ආදායමෙන් සේවක වැටුප් පවා ගෙවන මෙම රෝහල්වලට දැන් වැටුප් ගෙවීමට පවා නොහැකි මට්ටමකට පත්ව ඇති බව වාර්තා වේ. රජයෙන් ලැබෙන ප්‍රතිපාදන ප්‍රමාණවත් නොවීම, රෝගීන්ගෙන් ලැබෙන ආදායම අඩුවීම සහ නඩත්තුවට අධික පිරිවැයක් දැරීමට සිදුවීම මෙම තත්ත්වයට ප්‍රධාන හේතු වී ඇත. මෙම තත්ත්වය, රෝහල් පෞද්ගලීකරණය හෝ විදේශීය ආයෝජන සඳහා විවෘත කිරීමේ අදහස් මතුවීමට මග පෑදී තිබේ.
ජයවර්ධනපුර රෝහල සහ "ඉන්දීය ඖෂධ මාෆියාව"
අනුර-මෝදි ගිවිසුම්වලට අනුව, ශ්‍රී ජයවර්ධනපුර රෝහල ඉන්දීය ඖෂධ සමාගමකට පාලනය කිරීමට අවශ්‍ය මූලික සැලසුම් සකස් කර ඇති බවට ආරංචි මාර්ග සඳහන් කරයි. මෙම සැලසුම් අනුව, අදාළ සමාගම රෝහලෙන් 100% ක පාලනයක් ලබා ගැනීමට නියමිත බව වාර්තා වේ. මෙය සත්‍යයක් නම්, මෙරට සෞඛ්‍ය ක්ෂේත්‍රයේ ප්‍රමුඛ පෙළේ රෝහලක් විදේශීය සමාගමක පාලනයට නතුවීම බරපතල තත්ත්වයකි.
මෙම පියවර මගින් සෞඛ්‍ය සේවයේ ස්වාධීනත්වයට හා ප්‍රවේශවීමේ අයිතියට බලපෑම් එල්ල විය හැකිය. ඉන්දීය සමාගමක් විසින් රෝහල පාලනය කරන්නේ නම්, ඔවුන්ගේ ප්‍රමුඛතාවය ලාභ ඉපැයීම විය හැකි අතර, එය සේවාවන්හි ගුණාත්මක භාවයට සහ මිල ගණන්වලට සෘජුවම බලපෑම් ඇති කළ හැකිය.
මීට අමතරව, ශ්‍රී ජයවර්ධනපුර රෝහලේ වෛද්‍යවරුන් වන මහේෂි විජේරත්න සහ කෞෂල්‍යා වැනි අය බටහිර ඖෂධ සහ උපකරණ භාවිතා කරන බවට චෝදනා එල්ල කර රෝහලෙන් ඉවත් කිරීමට උත්සාහ කරන බවටද වාර්තා වේ. මෙම ක්‍රියාදාමය පිටුපස, ඉන්දීය ඖෂධ සහ උපකරණ සඳහා ප්‍රමුඛතාවය දීමේ උත්සාහයක් ඇති බවට සැකයක් පවතී. මෙම තත්ත්වය, ශ්‍රී ලංකාවේ සෞඛ්‍ය ක්ෂේත්‍රය "ඉන්දීය ඖෂධ මාෆියාවක" ගොදුරක් බවට පත්වීමේ අවදානමක් පවතින බවට ජනතාව අතර බියක් ඇති කර තිබේ.
ඉදිරි අභියෝග
මෙම තත්ත්වය තුළ, ශ්‍රී ලංකාවේ සෞඛ්‍ය පද්ධතියට විශාල අභියෝග රැසකට මුහුණ දීමට සිදුවනු ඇත. සෞඛ්‍ය සේවාවන් පෞද්ගලීකරණය වීම තුළින් සාමාන්‍ය ජනතාවට දැරිය හැකි මිලකට ගුණාත්මක සේවාවක් ලබා ගැනීමේ අවස්ථාව අහිමි විය හැකිය. එසේම, ලාභය ප්‍රමුඛ කොට සැලකීම නිසා රෝගී සත්කාරයේ ගුණාත්මකභාවය පිළිබඳව ගැටලු මතුවිය හැකි අතර, ඉන්දීය ඖෂධ සඳහා ප්‍රමුඛතාවය දීම දේශීය ඖෂධ කර්මාන්තයට දැඩි බලපෑමක් ඇති කරනු ඇත.
මෙම ගිවිසුම්වල සැබෑ අන්තර්ගතය සහ ශ්‍රී ලංකාවේ සෞඛ්‍ය පද්ධතියට ඒවායේ බලපෑම පිළිබඳව විනිවිදභාවයකින් යුතුව ජනතාව දැනුවත් කිරීම රජයේ වගකීමකි. එසේ නොවුණහොත්, ශ්‍රී ලංකාවේ සෞඛ්‍ය පද්ධතියේ අනාගතය පිළිබඳව ජනතාව තුළ පවතින බිය සහ සැකය තවදුරටත් වර්ධනය වනු ඇත.
@ නිරෝමී සුබ්‍රමනියම්
