ශ්‍රී ලංකා විදුලිබල මණ්ඩලය (CEB) යනු ලංකාවේ ප්‍රධාන විදුලිබල සැපයුම් ආයතනයයි.
වර්තමාන රජය විසින් ජාත්‍යන්තර මූල්‍ය අරමුදල (IMF) සමඟ ඇති කරගත් එකඟතාවලට අනුව, ආයතනය ප්‍රතිව්‍යුහගත කිරීමේ වැඩපිළිවෙලක් ක්‍රියාත්මක කර තිබෙනවා. මෙම ප්‍රතිව්‍යුහගත කිරීම යටතේ, විදුලිබල මණ්ඩලය වෙනම කොටස් හතරකට වෙන් කර, ඒවා ස්වාධීන සමාගම් හතරක් බවට පත් කිරීමට නියමිතයි.
(වෙනත් රජයක් ලංකාවේ බලයේ රැඳී සිටියානම් මෙම ක්‍රියාවලිය මෙතරම් පහසුවෙන් හා සම්පූර්ණ යෝජනාව මතම සිදු කිරීමට අවකාශයක් නොලැබෙනු ඇති බව ක්ෂේත්‍රයේ ප්‍රවීනයන් මෙන්ම දේශපාලන සමාජ විශ්ලේෂකයින්ගේ අදහසය)
ලංකා විදුලිබල මණ්ඩලය ප්‍රතිව්‍යුහගත කිරීම සහ වත්මන් වෙනස්කම්
මෙම වෙනස්කම් සිදු කර ඇත්තේ 2024 අංක 36 දරන ශ්‍රී ලංකා විදුලි බල පනත මගින්.
එම පනත මගින් විදුලිබල මණ්ඩලයේ තනි ඒකීය ව්‍යුහය වෙනස් කරමින්, පහත සඳහන් ප්‍රධාන අංශ හතරට අදාළව නව සමාගම් පිහිටුවීමට ඉඩ සලසා තිබෙනවා:
- විදුලි උත්පාදනය (Generation): විදුලිය නිපදවීම භාරව කටයුතු කරයි.
- සම්ප්‍රේෂණය (Transmission): උත්පාදනය කරන ලද විදුලිය සම්ප්‍රේෂණ ජාලය ඔස්සේ බෙදා හරියි.
- බෙදා හැරීම (Distribution): විදුලි බලය අවසාන පාරිභෝගිකයා වෙත බෙදා හැරීම සිදු කරයි.
- සුනිත්‍ය බලශක්ති සංවර්ධනය (Sustainable Energy Development): පුනර්ජනනීය බලශක්ති ව්‍යාපෘති සංවර්ධනය කිරීම සහ කළමනාකරණය කිරීම සිදු කරයි.
මෙම ක්‍රියාවලිය IMF නිර්දේශයන්ට අනුකූලව සිදු වන අතර, එහි ප්‍රධාන අරමුණු වන්නේ CEB හි කාර්යක්ෂමතාව ඉහළ නැංවීම, ආයතනික පාඩු අවම කිරීම සහ විදුලිබල අංශයේ විනිවිදභාවය වැඩි දියුණු කිරීමයි.
ස්වේච්ඡා විශ්‍රාම යෝජනා ක්‍රමය
මෙම ප්‍රතිව්‍යුහගත කිරීමේ ක්‍රියාවලියේ එක් පියවරක් ලෙස, ස්වේච්ඡා විශ්‍රාම යෝජනා ක්‍රමයද (Voluntary Retirement Scheme - VRS) ක්‍රියාත්මක කර තිබෙනවා. බලශක්ති අමාත්‍යවරයාගේ අත්සනින් යුතුව නිකුත් කර ඇති ගැසට් නිවේදනය මගින්, මෙම යෝජනා ක්‍රමයේ නියමයන් සහ කොන්දේසි පැහැදිලි කර තිබෙනවා.
මෙම යෝජනා ක්‍රමයට අනුව, ස්වේච්ඡා විශ්‍රාම යෑමට කැමති CEB සේවකයන්ට වන්දි ගෙවීම සඳහා පැහැදිලි නීති රීති දක්වා තිබෙනවා. වන්දි මුදල ගණනය කරනු ලබන්නේ සේවකයාගේ සේවා කාලය සහ ඉතිරිව ඇති සේවා කාලය මතයි.
- වසර 10ක් හෝ ඊට වැඩි සේවා කාලයක් ඇති සේවකයන්:
- සේවය කළ සෑම වසරකටම මාස දෙකක වැටුපක් සහ ඉතිරිව ඇති සෑම වසරකටම මාස එකහමාරක වැටුපක් වන්දි ලෙස හිමි වෙනවා.
- වසර 10කට වඩා අඩු සේවා කාලයක් ඇති සේවකයන්:
- සේවය කළ සෑම වසරකටම මාස පහක වැටුපක් හිමි වන අතර, ඉතිරි සේවා කාලය සඳහා කිසිදු ගෙවීමක් සිදු කරන්නේ නැහැ.
මෙම ප්‍රතිව්‍යුහගත කිරීම් සහ ස්වේච්ඡා විශ්‍රාම යෝජනා ක්‍රමය මගින්, CEB ආයතනය වඩාත් කාර්යක්ෂම, ලාභදායී සහ නවීන විදුලිබල සැපයුම් ආයතනයක් බවට පත් කිරීම අපේක්ෂා කෙරෙනවා.
මෙමගින් රටේ විදුලිබල ක්ෂේත්‍රය තවදුරටත් ස්ථාවර කරමින්, අනාගතයේදී පාරිභෝගිකයන්ට වඩා හොඳ සේවාවක් සැපයීම සඳහා අඩිතාලම දමනු ඇතැයි විදුලිබල ක්ෂේත්‍රයේ ප්‍රවීණයන් මත පළ කර තිබෙනවා.
@සමාරා පරණවිතාන
