මෙම ආණ්ඩුව බලයට පැමිණියේ රටේ පැතිර තිබූ හොරකම්, දූෂණ සහ ගජමිත්‍රවාදය
අවසන් කරන බවට දැඩි පොරොන්දු ලබා දෙමිනි. 67 ලක්ෂයක ජනතාවක් ඒ පොරොන්දු විශ්වාස කළ අතර, තවත් බොහෝ දෙනෙක් ඒ වෙනුවෙන් තම ඡන්දය ප්‍රකාශ කළහ.
නමුත් අද වන විට සිදුවෙමින් පවතින සිදුවීම්, එම පොරොන්දු හුදු වචනවලට පමණක් සීමා වූ බවට ප්‍රබල සාක්ෂි සපයයි. විශේෂයෙන්ම, නොරොච්චෝලේ බලාගාරයට අවශ්‍ය ගල් අඟුරු ටෙන්ඩර් ක්‍රියාවලියේ සිදුවෙමින් පවතින අක්‍රමිකතා, රටේ සමස්ත බලශක්ති අනාගතයම අනතුරේ හෙළා තිබේ.
මාලිමාණ්ඩුවත් ගජමිතුරුවාදයට!
ටෙන්ඩර් ක්‍රියාවලියේ විනිවිදභාවය පිළිබඳ ප්‍රශ්න
ජාතික ප්‍රසම්පාදන මාර්ගෝපදේශ අනුව, ගල් අඟුරු ටෙන්ඩරයක් සඳහා සාමාන්‍යයෙන් සති හයක කාලයක් ලබා දිය යුතුයි. නමුත් මේ වතාවේ ටෙන්ඩරය සඳහා ලබා දී ඇත්තේ සති තුනක කෙටි කාලයක් පමණි. මෙවැනි කෙටි කාලයක් ලබා දීමෙන් සිදුවන්නේ විවෘත තරගකාරීත්වයට ඉඩ නොදී, කලින්ම සූදානම්ව සිටි පුද්ගලයෙකුට හෝ සමාගමකට ටෙන්ඩරය ලබා ගැනීමට අවස්ථාව සැලසීමයි. මෙම ක්‍රියාවලිය පිටුපස යම් "ඩීල්" එකක් තිබේදැයි සැකයක් මතුවන්නේ එබැවිනි. රජය මෙම කෙටි කාලසීමාවට හේතුව ලෙස "හදිසි තත්වයක්" පෙන්වා දුන්නද, ඒ කුමන හදිසි තත්වයක්දැයි නිල වශයෙන් පැහැදිලි කර නැත.
තවත් බරපතළ කරුණක් වන්නේ ටෙන්ඩර් කැඳවීමේ ප්‍රමාදයයි. සාමාන්‍ය ක්‍රියාවලියට අනුව ගල් අඟුරු ටෙන්ඩර් කැඳවීම පෙබරවාරි-මාර්තු මාසවලදී ආරම්භ වී, ජූලි මාසයේදී සමාගම් තෝරා ගනී. පළමු ගල් අඟුරු තොගය සැප්තැම්බර් මුලදී රටට ගෙන්වා ගනී. නමුත් මේ වසරේදී ටෙන්ඩරය නිකුත් කර ඇත්තේ අගෝස්තු මාසයේදීය. මේ ප්‍රමාදය හේතුවෙන්, පළමු ගල් අඟුරු තොගය රටට ගෙන්වා ගැනීමට හැකිවන්නේ නොවැම්බර් මාසයේදී පමණ බව බලශක්ති අංශයේ විශේෂඥයෝ පෙන්වා දෙති.
ගැටලුවේ බරපතළකම
මෙම ටෙන්ඩර් ප්‍රමාදය සහ අක්‍රමිකතා හේතුවෙන් ජනතාවට ප්‍රධාන ගැටලු දෙකකට මුහුණ දීමට සිදුවනු ඇත.
- විදුලි බිල ඉහළ යාම: හදිසියේ ගල් අඟුරු මිලදී ගැනීමට සිදුවීම නිසා වැඩි මිලක් ගෙවීමට සිදුවනු ඇත. එහි බර අවසානයේදී දරන්නට සිදුවන්නේ විදුලි පාරිභෝගිකයන්ටයි. එය නැවත විදුලි බිල ඉහළ යාමට හේතුවක් විය හැකිය.
- විදුලි කප්පාදුව: අගෝස්තු -සැප්තැම්බර් මාස වන විට වැසි අඩු වීමත් සමඟ, ගල් අඟුරු හිඟයක් ඇති වුවහොත් විදුලි කප්පාදුවක් ඇති වීමේ ඉඩකඩ වැඩි ය.
රටේ ජනතාවට මෙවැනි ගැටලු ඇති වන බව දැන දැනම ටෙන්ඩර් ක්‍රියාවලිය ප්‍රමාද කළේ ඇයිද යන්න බරපතළ ප්‍රශ්නයකි.
චෝදනා සහ ගජමිත්‍රවාදය
විපක්ෂය සහ සිවිල් සමාජ කණ්ඩායම් චෝදනා කරන්නේ, මෙම ටෙන්ඩර් ක්‍රියාවලියේ අක්‍රමිකතා හිතාමතාම සිදුකර ඇති බවයි. මෙහි ප්‍රධාන අරමුණක් වන්නේ Panacape නම් සමාගමකට අසාධාරණ ලෙස ටෙන්ඩරය ලබා දීම බව ඔවුන් පවසනවා. මෙම සමාගම අයත් වන්නේ රුවන් ප්‍රනාන්දු නම් ව්‍යාපාරිකයාට වන අතර, ඔහු හිටපු ආණ්ඩුවේ පාලන සමයේ දූෂණ චෝදනා සමඟද සම්බන්ධ වී ඇති බවට තොරතුරු වාර්තා වේ. මෙම පුද්ගලයා, වත්මන් ජනාධිපති පාලන සමයේදී Hilton හෝටලයේ සභාපති ලෙස පත් කර ඇති අතර, එය ආණ්ඩුවේ ගජමිත්‍රවාදී ප්‍රතිපත්ති තවදුරටත් තහවුරු කරයි.
විහිළුව නම්, රාජපක්ෂ පාලන සමයේ උගන්ඩාවට මුදල් යැවූ බවට චෝදනා එල්ල වූ ගුවන් යානය සඳහා අනුග්‍රහය ලබා දී ඇත්තේ රුවන් ප්‍රනාන්දු සහ කනනාදන් යන පුද්ගලයන්ට අයත් Maileen සමාගම වීමයි. රාජපක්ෂ පාලනයේ දූෂණ ගැන විශාල වශයෙන් කතා කළ මෙම ආණ්ඩුව, දැන් එම පාලනය සමඟ සමීපව කටයුතු කළ පුද්ගලයන්ම ගජමිත්‍රයන් කරගෙන සිටීමෙන් පෙන්නුම් කරන්නේ පොරොන්දු ඉටු නොවූ බවයි.
ලංකා ගල් අඟුරු සමාගමේ සභාපතිගේ ඉල්ලා අස්වීම
මේ අතර, ලංකා ගල් අඟුරු සමාගමේ සභාපතිවරයා ඉල්ලා අස්වීම පිළිබඳව ද ප්‍රශ්න පැන නැගී ඇත. විපක්ෂය පවසන්නේ, මෙම අක්‍රමිකතා දෙස බලා සිටීමට නොහැකි වූ නිසා ඔහු ඉල්ලා අස් වූ බවයි. කෙසේ වෙතත්, ඉල්ලා අස්වීමෙන් ඔහුට වගකීමෙන් මිදිය නොහැකි බවත්, මේ පිළිබඳව පරීක්ෂණ පැවැත්විය යුතු බවත් බලශක්ති අමාත්‍යාංශය පවසනවා.
මෙම සිදුවීම, ආණ්ඩුව බලයට පැමිණි විට ලබා දුන් පොරොන්දු සහ වත්මන් තත්ත්වය අතර පරස්පරතාවක් පෙන්නුම් කරයි. මෙය හුදෙක් දේශපාලන ප්‍රශ්නයක් නොව, රටේ සමස්ත විදුලිබල පද්ධතියම සහ ජනතාවගේ දෛනික ජීවිතයට සෘජුවම බලපාන බරපතළ ගැටලුවක් බව පැහැදිලිය. ආණ්ඩුව මේ පිළිබඳව වහාම විනිවිදභාවයෙන් යුතුව පැහැදිලි කිරීමක් කළ යුතු අතර, වගකිවයුත්තන්ට එරෙහිව පියවර ගත යුතුය.
@සමාරා පරණවිතාන
ගල් අඟුරු වංචාව ගැන අදහස් දක්වන පෙරටුගාමී සමාජවාදී පක්ෂයේ අධ්‍යාපන ලේකම් පුබුදු ජයගොඩ...
