ශ්‍රී ලංකාවේ හිටපු නෝර්වීජියානු සාම නියෝජිත එරික් සොල්හයිම්, අත්අඩංගුවේ සිටින
හිටපු ජනාධිපති රනිල් වික්‍රමසිංහ ගේ සෞඛ්‍ය තත්ත්වය පිළිබඳව කනස්සල්ල පළ කරමින්, ඔහු වහාම නිදහස් කරන ලෙස ඉල්ලා තිබේ.
X (පෙර Twitter) සමාජ ජාලයේ සටහනක් තබමින් සොල්හයිම් කියා සිටියේ, වික්‍රමසිංහ ජනාධිපතිවරයා වහාම නිදහස් කරන ලෙස ඉල්ලා සිටින “ශ්‍රී ලංකාවේ, දකුණු ආසියාවේ සහ ලොව පුරා සිටින නායකයින්” සමඟ තමන් ද එක්වන බවයි. 2022 ආර්ථික හා දේශපාලන අර්බුද සමයේදී “ශ්‍රී ලංකාව බේරා ගැනීමට නැගී සිටි” නායකයා ලෙස ඔහු රනිල් වික්‍රමසිංහ හඳුන්වා දී ඇත.
වික්‍රමසිංහ ට එරෙහි චෝදනා “කිසිදු පදනමකින් තොර” බව පවසමින් සොල්හයිම් ඒවා ප්‍රතික්ෂේප කර තිබේ. එම චෝදනා සත්‍ය වුවද, ඒවා යුරෝපයේ කිසිදු සාපරාධී හෝ පිළිගත නොහැකි ක්‍රියාවක් ලෙස නොසැලකෙන බව ද ඔහු වැඩිදුරටත් කියා සිටී.
ශ්‍රී ලංකාවේ දූෂණ විරෝධී ව්‍යාපාරයට සහය පළ කරන අතරම, හිටපු සාම නියෝජිතයා බලධාරීන්ගෙන් ඉල්ලා ඇත්තේ වික්‍රමසිංහ ට එරෙහිව චෝදනා ඉදිරිපත් කිරීම වෙනුවට “සැබෑ ගැටලු කෙරෙහි අවධානය යොමු කරන ලෙසයි”.
