පසුගිය වසර පුරා නිකුත් කරන ලද මත්පැන් බලපත්‍ර පිළිබඳව, (විශේෂයෙන් 2024 ජනාධිපතිවරණය ප්‍රකාශයට පත් කළ දින සිට ආරම්භ වන කාල සීමාව ඇතුළුව)
අධිකරණයට සවිස්තරාත්මක තොරතුරු ලබා දෙන ලෙස ශ්‍රේෂ්ඨාධිකරණය ඊයේ (04) සුරාබදු කොමසාරිස් ජනරාල්වරයාට නියෝග කළේය.
හිටපු ජනාධිපති රනිල් වික්‍රමසිංහ ගේ මැතිවරණ ව්‍යාපාරයට සහාය දැක්වීම අරමුණු කරගත් බව කියන මත්පැන් බලපත්‍ර නිකුත් කිරීමේ නීත්‍යානුකූලභාවය අභියෝගයට ලක් කරන මූලික අයිතිවාසිකම් පෙත්සම් දෙකක් විභාග කරන අතරතුර, යසන්ත කෝදාගොඩ, ජනක් ද සිල්වා සහ මහින්ද සමයවර්ධන යන ත්‍රිපුද්ගල විනිසුරු මඩුල්ල විසින් මෙම නියෝගය නිකුත් කර තිබේ.
පෙත්සම් දෙකම ඉදිරියට ගෙන යාමට අධිකරණය අවසර දුන් අතර නොවැම්බර් 19 වන දින තර්ක කිරීම සඳහා කල් තැබීය.
පෙත්සම්කරුවන් චෝදනා කරන්නේ මත්පැන් බලපත්‍ර විශාල සංඛ්‍යාවක් නිකුත් කර ඇත්තේ "නීති විරෝධී, අසාධාරණ සහ අත්තනෝමතික ආකාරයෙන්" බවත්, විනිවිදභාවය සහ නිසි ක්‍රියා පටිපාටියට අනුකූල නොවී බවත්ය. මෙම ක්‍රියාමාර්ග දේශපාලනික වශයෙන් අභිප්‍රේරණය වී ඇති බවත්, හිටපු ජනාධිපතිවරයාගේ මැතිවරණ ව්‍යාපාරයට සම්බන්ධ ඇතැම් පුද්ගලයින්ට ප්‍රතිලාභ සැලසීම සඳහා උපායමාර්ගිකව සිදුකර ඇති බවත් ඔවුහු තර්ක කරති.
පෙත්සම්කරුවන්ට අනුව, විශ්වාසදායක තොරතුරුවලින් පෙනී යන්නේ, 2024 ජනාධිපතිවරණයට පෙර, සාධාරණ හෝ අපක්ෂපාතී සමාලෝචන ක්‍රියාවලියකින් තොරව තාවකාලික පදනමක් මත මත්පැන් බලපත්‍ර ලබා දී ඇති බවයි.
රුක්ෂාන් සේනාධීර සමඟ පෙනී සිටි ජනාධිපති නීතිඥ සංජීව ජයවර්ධන, (එස්.ඩබ්ලිව්. අමිල කුමාර ගේ උපදෙස් මත) පෙත්සම්කරුවන්ගෙන් එක් අයෙකු වෙනුවෙන් පෙනී සිටි අතර, මංජුල බාලසූරිය ගේ උපදෙස් මත මනුජය ද සිල්වා සමඟ ජනාධිපති නීතිඥ සාලිය පීරිස් තවත් පෙත්සම්කරුවන් කිහිප දෙනෙකු වෙනුවෙන් පෙනී සිටියේය.
