(විශේෂ අධිකරණ වාර්තාකරුවෙකු විසිනි).
රුපියල් කෝටි 14කට අධික මහජන මුදලක් වංක ලෙස ව්යවහරණය කරමින්, ප්රමිතියෙන් තොර 'හියුමන් ඉමියුනෝග්ලොබියුලීන්'
සහ 'රිටක්සිමැබ්' ප්රතිදේහ එන්නත් කුප්පි 6195ක් සෞඛ්ය අමාත්යාංශයේ වෛද්ය සැපයුම් අංශයට සැපයීමේ ආන්දෝලනාත්මක නඩුව මේ දිනවල කොළඹ ස්ථිර ත්රිපුද්ගල මහාධිකරණය හමුවේ විභාග වෙමින් පවතී.
ප්රියන්ත ලියනගේ, විරාජ් වීරසූරිය සහ තිලකරත්න බණ්ඩාර යන විනිසුරු මඩුල්ල හමුවේ ඊයේ (19) විභාග වූ මෙම නඩුවේදී, හිටපු සෞඛ්ය අමාත්ය කෙහෙළිය රඹුක්වැල්ල ඇතුළු විත්තිකරුවන් දොළොස් දෙනාට එරෙහිව නැගී ඇති චෝදනා සම්බන්ධයෙන් පැමිණිල්ල සහ විත්තිය අතර තියුණු නෛතික සංවාදයක් නිර්මාණය විය. විශේෂයෙන්ම, අධිකරණයේ සජීවී වාතාවරණය තුළ නීතිඥවරුන්ගේ තර්ක විතර්ක සහ හරස් ප්රශ්න මෙහෙයවීම් නඩුවේ දිශානතිය තීරණය කරන ප්රබල සාධක බවට පත්ව තිබුණි.
නඩුවේ 12 වැනි චූදිත වන ජාතික ඖෂධ නියාමන අධිකාරියේ (NMRA) හිටපු සභාපතිවරයා වෙනුවෙන් පෙනී සිටි ජ්යෙෂ්ඨ නීතිඥ චමින්ද අතුකෝරාල මහතා සිය හරස් ප්රශ්න මගින් මනාව ගොඩනැගීමට උත්සාහ කළේ තම සේවාදායකයා මෙම ජාවාරමේ අනුබලකරුවෙකු නොව, එහි සත්ය තත්ත්වය කල්තියා හඳුනාගෙන ඊට එරෙහිව පරිපාලනමය මැදිහත්වීමක් සිදුකළ අවදියෙන් සිටි නිලධාරියෙකු බවයි.
විශේෂයෙන්ම, අපරාධ පරීක්ෂණ දෙපාර්තමේන්තුවට (CID) යාමට පෙර ආයතනික මට්ටමින් අදාළ ඉන්දීය සමාගම සහ ඇගයීම් වාර්තා පිළිබඳව නිසි සොයාබැලීමක් කරන ලෙසට සභාපතිවරයා ලබාදුන් උපදෙස් මගින් පෙනී යන්නේ, යම් ගැටලුසහගත තත්ත්වයක් වටහාගත් වහාම ඔහු ක්රියාත්මක වී ඇති බවයි. මෙය සභාපතිවරයාගේ විශ්වසනීයත්වය (Credibility) අධිකරණය හමුවේ තහවුරු කිරීමට විත්තිය ගත් සාර්ථක නෛතික මෙන්ම තාර්කික උපායමාර්ගයක් ලෙස කැපී පෙනුණි. එම තත්ත්වය සහකාර ඖෂධ ඇගයීම් නිලධාරිනී නිෂානි ලංකා කරුණාතිලක මහත්මියගේ සාක්ෂියෙන්ද මනාව තහවුරු විය.
විත්තියේ නීතිඥ:
"අද විත්තිකූඩුවේ සිටින දොළොස්වන විත්තිකරු තමයි ඔබට උපදෙස් දුන්නේ ප්රශ්නගත එකී ඖෂධ ගැන සොයා බලන්න කියලා?"
සාක්ෂිකාරිය:
"ඔව් ස්වාමීනී, ඔහු කළ දැනුම් දීම අනුව මම රාජ්ය ඖෂධ නීතිගත සංස්ථාවට කතා කරලා බලලා එතුමාට කීවා එම ඖෂධ දෙකට අදාලව ඖෂධ ඇගයීම් කමිටු වාර්තා ලබාදී නොමැති බව... ඉන්දියාවේ සමාගමෙන් නිෂ්පාදනය කර නොමැති බවත් මා එතුමාට කීවා."
අදාළ ඖෂධ තොගය නිකුත් නොකර වෛද්ය සැපයුම් අංශයේ රඳවා තබාගැනීමට 2023.09.02 දින නියෝග කිරීම සහ පරිපාලන නිලධාරිනිය හරහා 2023.10.03 දින CID යට පැමිණිලි කිරීම සම්බන්ධයෙන් සාක්ෂිකාරිය නොදැන සිටියද, විත්තිය එම ප්රශ්න හරහා අධිකරණයට යොමු කළ පණිවිඩය පැහැදිලිය. එනම්, හිටපු සභාපතිවරයා නිහඬව නොසිට නීත්යානුකූල පියවර ගැනීමට උත්සාහ කර ඇති බවයි.
අධිකරණය උණුසුම් කළ නීතිඥ ගැටුම
නඩුව අතරතුර හරස් ප්රශ්න ඇසීමේ සීමාවන් සහ නීතිමය පටිපාටිය පිළිබඳව පැමිණිල්ල සහ විත්තිය අතර ඇතිවූ මතභේදය එක් අවස්ථාවකදී උණුසුම් වචන හුවමාරුවක් දක්වා දුරදිග ගියේය. නියෝජ්ය සොලිසිටර් ජෙනරාල් (DSG) ලක්මිනී ගිරිහාගම මෙනෙවිය තමා උත්සාහ කරන්නේ විත්තිය මතුකළ කරුණුවලට පිවිසීමට බව අධිකරණයට පැහැදිලි කිරීමට යාමේදී, විත්තියේ නීතිඥවරයා සහ ඇය අතර ඇතිවූ ඒ තියුණු සංවාදය නඩුවේ තිබෙන සංවේදීභාවය මනාව පිළිඹිබු කළේය.
නීතිඥ චමින්ද අතුකෝරාල:
"දැන් ගරු අධිකරණය ඒ ගැන නියෝගයක් දීලයි තියෙන්නේ. අධිකරණය දුන් නියෝග අනුව කටයුතු කරනවා මිස එකී නියෝගය ගැන නැවත විග්රහ කරන්න පැමිණිල්ලට බැහැ. අධිකරණය ලබාදෙන නියෝග වලට අපි කවුරුත් අවනත වෙන්න ඕනා."
නියෝජ්ය සොලිසිටර් ජෙනරාල්වරිය (විත්තියේ නීතිඥවරයා දෙසට හැරී):
"ඔබතුමා ඔබතුමාගේ සීමාව ඉක්මවා යනවා. මම විනිසුරු මඩුල්ලට ඒ ගැන පහදාදීමටයි හැදුවේ."
නීතිඥ චමින්ද අතුකෝරාල:
"ඔය විදිහට හයියෙන් කතා කරලා විත්තිය බය ගන්වන්න හදන්න එපා. ඔහොම හයියෙන් කතා කරන්න ගිහින් මහාධිකරණයේදී සිද්ධ වුන දේ මතකයිනේ?"
මෙම උණුසුම් තත්ත්වය හමුවේ සභාපති විනිසුරුවරයා මැදිහත් වෙමින්, නිසි ක්රමවේදයට සහ අධිකරණමය සීමාවන් තුළ පිහිටා ප්රශ්න නගන ලෙස දෙපාර්ශවයටම අවවාද කිරීම කැපී පෙනුණි.
පැමිණිල්ලේ ප්රතිප්රහාරය: "ව්යාජ සහතිකවල සත්යය"
විත්තියේ තර්ක හමුවේ පැමිණිල්ල නිහඬ වූයේ නැත. නියෝජ්ය සොලිසිටර් ජෙනරාල්වරිය යළි ප්රශ්න නැගීමේදී (Re-examination) පැමිණිල්ලේ ප්රබලතම සාක්ෂියක් අධිකරණය හමුවේ නැවත තහවුරු කළාය.
එනම්, 2025.06.03 දින ශ්රී ලංකා රේගුවට පළමුවන විත්තිකරු විසින් ඉදිරිපත් කළ අංක CUS/ICT/STATE/3084 දරන ඖෂධ ඇගයීම් කමිටු සහතිකය ඖෂධ නියාමන අධිකාරියෙන් නිකුත් කළ එකක් නොවන බවත්, එහි ආකෘතිය පවා සම්පූර්ණයෙන්ම ව්යාජ එකක් බවත් සාක්ෂිකාරිය ලවා යළිත් තහවුරු කරගැනීමයි.
ඉදිරි පියවර
දින 8ක් පුරා විභාග වූ සහකාර ඖෂධ ඇගයීම් නිලධාරිනියගේ සාක්ෂි විමසීම ඊයේ දිනෙන් අවසන් වූ අතර, නඩු විභාගය ලබන 23 වැනිදා දක්වා කල් තැබිණි. එදිනට පැමිණිල්ලේ 33 වැනි සාක්ෂිකාරිය වන ඖෂධවේදිනී අමිලා කුමාරි සහ 52 වැනි සාක්ෂිකරු වන NMRA හි ඖෂධවේදී අයන්ත සඳරුවන් යන මහත්ම මහත්මීන්ට අධිකරණය හමුවේ පෙනී සිටින ලෙස සිතාසි නිකුත් කර ඇත.
මෙම නඩුව හුදෙක් රාජ්ය සම්පත් අවභාවිතයක් පිළිබඳ විභාගයක් පමණක් නොව, රාජ්ය නිලධාරීන්ගේ වගකීම්, ඔවුන්ගේ සීමාවන් සහ තීරණ ගැනීමේදී ඔවුන් මුහුණදෙන යථාර්ථය පිළිබඳව සමාජයට කදිම පාඩමක් කියාදෙන අධිකරණමය කැඩපතක් බවට පත්ව තිබේ.
නඩු වාර්තාව
19/02/2026
ඉන්දියානු ණය යෝජනා ක්රමය යටතේ හදිසි ප්රසම්පාදන ක්රියාවලිය මත ආනයනය කළ හියුමන් හිමියුනෝග්ලොබියුලීන් සහ රිටක්සිමැබ් ( Human Immunoglobulin and Rituximab) යන ඖෂධ දෙක ප්රසම්පාදනය කිරීම පිළිබඳ යම් ගැටලු සහගත තත්ත්වයක් ඇතිවූ අවස්ථාවේදී පොලිසියට පැමිණිලි කිරීමට පෙර රාජ්ය ඖෂධ නීතිගත සංස්ථාව ඇතුළු වගකිවයුතු ආයතන වලින් නිසි සොයා බැලීමක් කරන ලෙසට එවකට ඖෂධ නියාමන අධිකාරියේ සභාපතිවරයා ලෙස කටයුතු කළ 12වන චූදිත තමාට උපදෙස් ලබා දුන්නේ යැයි ඖෂධ නියාමන අධිකාරියේ සහකාර ඖෂධ ඇගයීම් නිලධාරිනි නිෂානි ලංකා කරුණාතිලක මහත්මිය කොළඹ ස්ථිර ත්රිපුද්ගල මහාධිකරණය හමුවේදී සාක්ෂිදෙමින් ඊයේ (19) ප්රකාශ කළාය. එකී ඖෂධ ආනයනය කිරීම සඳහා ඖෂධ ඇගයීම් කමිටුව විසින් සහතික නිකුත් කර ඇතිදැයි සොයා බලන ලෙසටත් ඒවා නිෂ්පාදනය කළ බව කියන ඉන්දියානු සමාගමෙන් සොයාබලන ලෙසටත් දොළොස්වන චූදිත ලබා දුන් උපදෙස් අනුව ක්රියාත්මක වූ තමා ඒ පිළිබඳව සොයා බැලීමක් කලේ යැයිද දොළොස්වන චූදිත වෙනුවෙන් පෙනී සිටි ජ්යෙෂ්ඨ නීතිඥ චමින්ද අතුකෝරාල මහතා නැගූ හරස් ප්රශ්න වලට පිළිතුරු දෙමින් සාක්ෂිකාරිය පැවසුවාය.
ප්රමිතියෙන් තොර ප්රතිදේහ එන්නත් කුප්පි 6195 ක් සෞඛ්ය අමාත්යාංශයේ වෛද්ය සැපයූම් අංශයට සපයා රුපියල් කෝටි 14ට අධික මුදලක් වංක ලෙස ව්යපහරණය කිරීම ඇතුළු චෝදනා 13ක් යටතේ හිටපු සෞඛ්ය අමාත්ය කෙහෙළිය රඹුක්වැල්ල මහතා ඇතුළු විත්තිකරුවන් දොළොස් දෙනෙකුට එරෙහිව නීතිපතිවරයා විසින් පවරා තිබූ එම නඩුව ප්රියන්ත ලියනගේ, විරාජ් වීරසූරිය හා තිලකරත්න බණ්ඩාර යන මහත්වරුන්ගෙන් සමන්විත කොළඹ ස්ථිර ත්රිපුද්ගල මහාධිකරණය හමුවේදී පැවැත්විණි.
නීතිඥ චමින්ද අතුකෝරාල මහතා ; සාක්ෂිකාරිය අමතමින් ; ඔබට අවබෝධයක් තිබෙනවා නේද ප්රශ්නගත පෙර මා කිවූ, ඖෂධ දෙක ගැන. ඔබ එම සිද්ධියට අදාලව අපරාධ පරීක්ෂණ දෙපාර්තමේන්තුවට ප්රකාශ කීපයක්ම දුන්නා කියලා මූලික සාක්ෂි මෙහෙයවීමේදී ඔබ කීවා නේ? අපරාධ පරීක්ෂණ දෙපාර්තමේන්තුව ඔබගෙන් ප්රකාශ සටහන් කරන විට ඒ පිළිබඳව ඔබට කියන්න ඇති කියලා මා යෝජනා කරනවා.
සාක්ෂිකාරිය ; ඔව් ස්වාමීනි
විත්තියේ නීතිඥවරයා ; අද විත්තිකූඩුවේ සිටින දොළොස්වන විත්තිකරු තමයි ඔබට උපදෙස් දුන්නේ ප්රශ්නගත එකී ඖෂධ ගැන සොයා බලන්න කියලා.
සාක්ෂිකාරිය ; ඔව් ස්වාමීනී ඔහු කළ දැනුම් දීම අනුව මම රාජ්ය ඖෂධ නීතිගත සංස්ථාවට කතා කරලා බලලා එතුමාට කීවා එම ඖෂධ දෙකට අදාලව ඖෂධ ඇගයීම් කමිටු වාර්තා ලබාදී නොමැති බව. ඒවා ආනයනය කිරීම සඳහා අයදුම් පත්ර ලැබී නොමැති බවත් මා ඔහුට කීවා. නිෂ්පාදිත සමාගම ගැන සොයා බලන ලෙසට ඔහු ලබා දුන් උපදෙස් අනුව මා ඒ පිළිබඳව සොයා බලා එවැනි ඖෂධයක් ඉන්දියාවේ සමාගමෙන් නිෂ්පාදනය කර නොමැති බවත් මා එතුමාට කීවා.
විත්තියේ නීතිඥවරයා ; ඖෂධ නියාමන අධිකාරියට යම් ඖෂධයක් ලියාපදිංචි කිරීම සඳහා අයදුම් පත්රයක් ඉදිරිපත් කරන විට ඒ සඳහා යම් රැඳවුම් ගාස්තුවක් ගෙවීමට අවශ්යයි නේ. එකී ගාස්තුව ගෙවා ඇති බවට ඔබ සොයා බැලීමක් කළාද? එය සොයා බලන්න ඕනා මුදල් අංශයෙන් කියා ඔබ ඔහුට කීවාද?
සාක්ෂිකාරිය ; මට ඒ ගැන දැනීමක් නෑ.
විත්තියේ නීතිඥ චමින්ද අතුකෝරාල මහතා ; දොළොස්වන චූදිත යටතේ සේවය කළ පරිපාලන නිලධාරිනී. මනෝජා ප්රියංගනී මහත්මිය මගින් ඒ පිළිබඳව 2023.10.03 වැනිදා අපරාධ පරීක්ෂණ දෙපාර්තමේන්තුවට පැමිණිලි කළ බව ඔබට දැනීමක් ඇති කියලා මා යෝජනා කරනවා.
සාක්ෂිකාරිය ; ඒ පිළිබඳව මට දැනීමක් නෑ.
විත්තියේ නීතිඥ ; දොළොස්වන චූදිත එකී ඖෂධ වර්ග දෙක නිකුත් නොකර වෛද්ය සැපයුම් අංශයේ රඳවා තබා ගැනීමට වෛද්ය සැපයූම් අංශයේ නියෝජ්ය අධ්යක්ෂ ජෙනරාල් වරයාට 2023.09.02 වැනිදා නියෝග කොට තිබූ බව ඔබ දන්නවා ඇතැයි මා යෝජනා කරනවා. ඔබ ඒ ලිපිය දැකලා තියෙනවද?
සාක්ෂිකාරිය ; ඒ ගැන මම දන්නේ නෑ. එම ලිපිය මම දැකලා නෑ.
විත්තියේ නීතිඥවරයා ; ඔබ වර්තමානයේ සේවය කරන ඖෂධ ඇගයීම් අංශයේ රාජකාරි භාර ගන්නා අවස්ථාවේ දී එකී අංශයට අදාළ කටයුතු පිළිබඳ අවබෝධයක් ලබා ගැනීම සඳහා එකී කටයුතුවලට අදාල ලිපිගොනු ලේඛන අධ්යයනය කළ බව සාක්ෂි දෙමින් කීවානේ. ඖෂධ නියාමන අධිකාරියේ අධ්යක්ෂ මණ්ඩල පත්රිකා ඔබ දැකලා ඇතිනේ? මෙම ලේඛනය අධ්යක්ෂ මණ්ඩල පත්රිකාවක් සහ ඒ සමඟ අමුණා තිබූ මෙමෝ සටහන් පත්රයක් කියලා ඔබට හඳුනාගන්න පුළුවන්ද ? 12 වී 1 ලෙස ලකුණු කර තිබෙන්නේ අධ්යක්ෂ මණ්ඩල පත්රිකාවක් කියලා ඔබ පිළිගන්නවාද ?
(විත්තියේ නීතිඥවරයා අධිකරණ භාෂණ පරීක්ෂකවරිය මගින් අංක 6 ගොනුවේ 126 (O) ලෙස ලකුණු කර තිබූ ලේඛණය සාක්ෂිකාරියට ඉදිරිපත් කරයි)
විත්තියේ නීතිඥවරයා ; එම ලේඛනය ඔබගේ කේත අංකය ඇතුලත් කර යොමු කළ ප්රතිග්රාහක ලිපියක් නේද? එහි අත්සන් කර තිබෙන්නේ එම සමයේ දොළොස්වන චූදිත විදේශගතව සිටීම නිසා ඔහුගේ රාජකාරී ආවරණය කළ නියෝජ්ය අධ්යක්ෂ අජිත් ප්රියදර්ශන මහතා බව ඔබ පිළිගන්නවාද ? ඔබ විෂය පිළිබඳ හැදෑරූ වෘත්තීයවේදිනියක් ඔබ දන්නවා ඇතිනේ! විෂයට අදාළ තාක්ෂණික වචන. පෙරකියුටින් ගුඩ්ස් ලෙසින් හඳුන්වන්නේ මොනවාද ? මම එලෙස ඇසුවොත් එමගින් හඳුන්වන්නේ ඖෂධ වෛද්ය උපකරණ දේවල් කියලා ඔබ පිළිගන්නවාද ?
සාක්ෂිකාරිය ; ඔව් ස්වාමීනි සමහර ඖෂධ වර්ගත් එම ඝනයට අයත් වෙනවා.
විත්තියේ නීතිඥවරයා ; 2022.09.16 පැවැති අධ්යක්ෂ මණ්ඩල පත්රිකාව හා එයට අමුණා තිබූ මෙමෝ පත්රය තමයි 12 වි 1 ලෙස ලකුණු කර ඇත්තේ කියන එක ඔබට පිළිගන්න පුළුවන්ද?
සාක්ෂිකාරිය ; ඔව් ස්වාමීනි
විත්තියේ නීතිඥ චමින්ද අතුකෝරාල මහතා ; මේ සංශෝධිත අධ්යක්ෂ මණ්ඩල පත්රිකාවෙන් ජයිකා ව්යාපෘතිය හා ආසියානු සංවර්ධන ව්යාපෘතිය ඇතුළු හදිසි ප්රසම්පාදන ක්රමවේද යටතේ ඖෂධ ආනයනය කිරීමට අදාළව නේද සඳහන් කර තිබෙන්නේ. එවැනි ඖෂධ ගෙන්වීමේදී ඒවායේ ගුණාත්මක භාවය පිළිබඳව පරීක්ෂා කිරීමේ ක්රමවේද තියෙනවා කියා මා යෝජනා කළොත් ඔබ ඒක පිළිගන්නවාද ?
සාක්ෂිකාරිය ; ඔව් අදටත් ඒ ක්රමවේද තිබෙනවා.
නියෝජ්ය සොලිසිටර් ජෙනරාල් ලක්මිනී ගිරිහාගම මෙනෙවිය ; මට ඒ හරස් ප්රශ්න ගැන නිවැරදි කිරීමක් කරන්න තිබෙනවා. දොළොස්වන චූදිතගේ නීතිඥ මහතා ඇසුවා ඔහු ඉදිරිපත් කළ අධ්යක්ෂ මණ්ඩල සටහන් හා මෙමෝ පත්රය ගැන ඔබට අවබෝධයක් තිබෙනවාද? ඖෂධ නියාමන අධිකාරියේ අධ්යක්ෂ මණ්ඩල රැස්වීම පැවැත්වෙන ආකාරය පිළිබඳව? ඔබ එම රැස්වීම් වලට ගිහින් තියෙනවාද? එවැනි අධ්යක්ෂ මණ්ඩල රැස්වීම් සාකච්ඡා වලට ලැබෙන්නේ ඊමේල් මාර්ගයෙන් කියලනේ ඔබ පෙර සාක්ෂි දුන්නේ ඊමේල් ලැබෙන තුරු ඔබ දන්නේ නෑනේ අධ්යක්ෂ මණ්ඩලය ඇතුළේ වෙන සාකච්ඡා පිළිබඳව? එවැනි අධ්යක්ෂ මණ්ඩල රැස්වීම් යාවත්කාලීන කිරීම් ගැන ඔබ දැනුවත්ද ?
සාක්ෂිකාරිය ; මම ඒ බව දැනගත්තේ ඊමේල් පණිවිඩ ලැබුණට පසුවයි.
නියෝජ්ය සොළිසිටර් ජෙනරාල්වරිය ; ඔබගෙන් දොළොස්වන විත්තිකරුගේ නීතිඥ මහතා ඇසුවා ප්රශ්නගත ඖෂධ නිෂ්පාදනය කර ඇති ඉන්දියානු සමාගම ගැන සොයා බලන්න කියලා දොළොස්වන විත්තිකරු ඔබට උපදෙස් දුන්නා කියන කාරණය ගැන. ඒ වගේම එම හියුමන් ඉමියුනෝග්ලොබියුලීන් හා රිටක්සිමැබ් කියන ඖෂධ දෙක රඳවා තබා ගැනීමට එම විත්තිකරු උපදෙස් ලබාදීමක් ගැනත් ඇසුවා. ඔය ලිපි දෙක ගැන කතා කරන්න ඔබට අවබෝධයක් තිබෙනවාද ? ඖෂධ සුරක්ෂිත කමිටුව විසින් කළ යුතු රාජකාරී කටයුතු ගැන ඔබට අවබෝධයක් තිබෙනවාද ?
සාක්ෂිකාරිය ; නැහැ ස්වාමීනී
නියෝජ්ය සොළිසිටර් ජෙනරාල් වරිය ; දොලොස්වන විත්තිකරු මනෝජා නමැති පරිපාලන නිලධාරිනිය මගින් අපරාධ පරීක්ෂණ දෙපාර්තමේන්තුවට පැමිණිලි කළ බව දන්නවාද කියලත් විත්තියේ නීතිඥ මහතා ඇසුවා. ප්රශ්නගත ඖෂධ දෙක ගැන 2023.10 මස ඖෂධ සුරක්ෂිත කමිටුව මගින් උපදෙස් ලබාදීමක් ගැන ඔබට අවබෝධයක් තිබුණාද ?
නීතිඥ චමින්ද අතුකෝරාල මහතා ; මම සුරක්ෂිත කමිටුවක් ගැන මෙම සාක්ෂිකාරියගෙන් හරස් ප්රශ්නයක් ඇසුවේ නෑ. ඒ නිසා පැමිණිල්ලට බෑ මම අහපු නැති කරුණක් ගැන සාක්ෂිකාරියගෙන් නැවත ප්රශ්න අසන්න.
අධිකරණය ; එම කරුණු ගැන නිසි ක්රමවේදයට අසන්න මේ විදියට අහන්න එපා.
නියෝජ්ය සොලිසිටර් ජෙනරාල්වරිය ; නෑ ස්වාමිනි! විත්තියෙන් මේ සාක්ෂිකාරියගෙන් විවිධ කරුණු ගැන හරස් ප්රශ්න ඇසුවා. එකී කරුණු වලට පිවිසීමටයි මම එම ප්රශ්නය ගැන සාක්ෂිකාරියගෙන් නැවත ප්රශ්නයක් ඇසුවේ.
විත්තියේ නීතිඥ චමින්ද අතුකෝරාල මහතා ; දැන් ගරු අධිකරණය ඒ ගැන නියෝගයක් දීලයි තියෙන්නේ. අධිකරණය දුන් නියෝග අනුව කටයුතු කරනවා මිස එකී නියෝගය ගැන නැවත විග්රහ කරන්න පැමිණිල්ලට බැහැ. අධිකරණය ලබාදෙන නියෝග වලට අපි කවුරුත් අවනත වෙන්න ඕනා.
නියෝජ්ය සොලිසිටර් ජෙනරාල් වරිය ; විත්තියේ නීතිඥ චමින්ද අතුකෝරාල මහතා දෙසට හැරී ඔබතුමා ඔබතුමාගේ සීමාව ඉක්මවා යනවා. මම විනිසුරු මඩුල්ලට ඒ ගැන පහදාදීමටයි හැදුවේ.
නීතිඥ චමින්ද අතුකෝරාල මහතා ; ඔය විදිහට හයියෙන් කතා කරලා විත්තිය බය ගන්වන්න හදන්න එපා. ඔහොම හයියෙන් කතා කරන්න ගිහින් මහාධිකරණයේදී සිද්ධ වුන දේ මතකයිනේ?
පැමිණිල්ලේ සාක්ෂි ලෙස ලකුණු කර ඇති පළමුවන විත්තිකරු විසින් 2025.06.03 දින ශ්රී ලංකා රේගුවට ඉදිරිපත් කළැයි කියන අංක CUS/ ICT/STATE/3084 දරන ඖෂධ ඇගයීම් කමිටු සහතිකය ඖෂධ නියාමන අධිකාරිය විසින් නිකුත් කළ සහතිකයක් නොවන බවත් එම සහතිකයේ ආකෘතියද ඖෂධ නියාමන අධිකාරිය විසින් නිකුත් කරනු ලබන සහතික වල ආකෘතිය අනුව සකස් කර නොමැති බවත් එම සාක්ෂිකාරිය පැමිණිල්ල මෙහෙයවන නියෝජ්ය සොලිසිටර් ජෙනරාල් ලක්මිණී ගිරිහාගම මෙනෙවිය නැගූ නැවත ප්රශ්නවලට පිළිතුරු ලබාදෙමින් පැවසුවාය.
තුන්වන විත්තිකාර වෛද්ය සැපයූම් අංශයේ හිටපු සහකාර අධ්යක්ෂිකා පීස් දේවශාන්තිනී සොලමන්ස් මහත්මිය වෙනුවෙන් පෙනී සිටි නීතිඥ ඉසුරු ජයවර්ධන මහතා එහිදී එම සාක්ෂිකාරියගෙන් දීර්ඝ ලෙස හරස් ප්රශ්න නගමින් ඖෂධ නියාමන අධිකාරියේ වගකීම වනුයේ ගුණාත්මක තත්ත්වයෙන් යුත් ඖෂධ මිලදී ගැනීමට වගබලා ගැනීම නොවන්නේ දැයි විමසා සිටියේය. එමෙන්ම වෛද්ය සැපයුම් අංශයේ වගකීම වනුයේ රටට අවශ්ය ඖෂධ තොග පවත්වාගෙන යාම හා බෙදාහැරීම නොවන්නේ දැයි විත්තියේ නීතිඥවරයා සාක්ෂිකාරියගෙන් විමසා සිටි අතර තමන්ට ඒ පිළිබඳව දැනීමක් නොමැති බව සාක්ෂිකාරිය එම පැනයට පිළිතුරු දෙමින් පැවසුවාය. විත්තියේ නීතිඥවරයා එම සාක්ෂිකාරියගෙන් ඇයට අදාළ නොවන විෂයක් පිළිබඳව හරස් ප්රශ්න සම්බන්ධයෙන් නියෝජ්ය සොළිසිටර් ජෙනරාල්වරිය විරුද්ධත්වය දැක්වූ අතර සාක්ෂිකාරියගේ විෂයපථයට අයත් නොවන කරුණු ගැන සාක්ෂිකාරියගෙන් හරස් ප්රශ්න නොඅසන ලෙසට සභාපති විනිසුරුවරයා විත්තියේ නීතිඥවරයාට අවවාද කළේය.
පුරා දින අටක් තිස්සේ සිදු කළ එම සාක්ෂිකාරියගේ සාක්ෂි විමසීම ඉන් අවසන් කළ අතර ලබන 23 වැනිදා දක්වා සාක්ෂි විභාගය කල් තැබූ විනිසුරු මඩුල්ල පැමිණිල්ල වෙනුවෙන් සාක්ෂි ලබාදීම සඳහා එදින අධිකරණය හමුවේ පෙනී සිටින ලෙස දන්වා පැමිණිල්ලේ 33වන සාක්ෂිකාරිය වන දකුණු කොළඹ ශික්ෂණ රෝහලේ ඖෂධ වේදනියක ලෙස රාජකාරි කරන අමිලා කුමාරි ඒකනායක මහත්මියට හා පැමිණිල්ලේ 52වන සාක්ෂිකාර ජාතික ඖෂධ නියාමන අධිකාරියේ ඖෂධවේදී අයන්ත සඳරුවන් අභයවික්රම මහතාට සිතාසි යැවිමට නියෝග කළේය.
සටහන -අචලා
