'දූෂණ චෝදනාවකට මුහුණ දීමට නියමිත' බව කියන NPP ඇමතිවරයාට එල්ල කෙරෙන චෝදනා මොනවා ද?
ජාතික ජන බලවේග රජයේ "පළමුවෙන් ම දූෂණ චෝදනාවකට මුහුණ දීමට නියමිත" අමාත්‍යවරයෙකු පිළිබඳ සිරස්තල රැගත් තොරතුරු මේ වන විට ප්‍රධාන මාධ්‍යවල පවා පළවෙමින් තිබේ.
බලශක්ති අමාත්‍ය කුමාර ජයකොඩිට එරෙහි වසර ගණනකට ඉහතදී එල්ල වී තිබූ මෙම චෝදනාව යළිත් කරළියට පැමිණියේ, මේ වසරේ පෙබරවාරි මාසයේදී පැවති අයවැය විවාදය අතරතුර පාර්ලිමේන්තු මන්ත්‍රී ෂානක්කියන් රාසමාණික්කම් කළ ප්‍රකාශයක් සමග ය.
"මම එදා කිව්වා පාර්ලිමේන්තුවේදි ජාතික ජන බලවේගයේ කැබිනට් අමාත්‍යවරයෙකුට විරුද්ධව වංචා චෝදනා තියෙනවා. එයා ඉන්ටඩික්ට් වුණා. ඊට පස්සෙ එයා ලේබර් ට්‍රිබියුනල් එකටත් ගියා. ඒකෙනුත් වැරදිකරු වුණා කියලා,"
මන්ත්‍රී ෂානක්කියන් රාසමාණික්කම් සිහිපත් කළේ ය.
මේ අතර, මෙම චෝදනාව සම්බන්ධයෙන් අල්ලස් හෝ දූෂණ චෝදනා කොමිෂන් සභාව විමර්ශනයක් ආරම්භ කිරීමට සූදානම් වන බවට ද ප්‍රවෘත්ති වාර්තා පළ විය.
ඒ සම්බන්ධයෙන් තොරතුරු දැන ගැනීමට එම කොමිසමේ අධ්‍යක්ෂ ජනරාල් රංග දිසානායකගෙන් විමසීමට බීබීසී සිංහල උත්සහ කළ ද, එය සාර්ථක නොවී ය.
කුමාර ජයකොඩිට එරෙහි චෝදනා මොනවා ද?
බලශක්ති අමාත්‍ය කුමාර ජයකොඩිට එරෙහි චෝදනා 2015 වසර තෙක් අතීතයට දිව යයි.
ඔහු එකල ලංකා පොහොර සමාගමේ ප්‍රසම්පාදන සහ ආනයන අංශයේ කළමනාකරු ලෙස කටයුතු කර තිබිණි.
ඔහු ම පවසන පරිදි, ලංකා පොහොර සමාගමේ හුණුපිටිය ගබඩා සංකීර්ණයේ භූමිය මත කාපට් ඇතිරීම සඳහා සිදු කළ ප්‍රසම්පාදන ක්‍රියාවලියක පැවති දෝෂයක් එම චෝදනාවට හේතු වී තිබේ.
"ඕන ම මැනේජර් කෙනෙකුට වගකීමක් තියෙනව නෙ. වැඩ කරනකොට අතපසුවීම් හරි මිස්ටේක්ස් හරි වෙන්න. මට දුන්න මේකෙ මම කොක්කක් ගහල යවපු එක විතර යි තියෙන්නෙ. සබ්ජෙක්ට් එක කරන කෙනා ඒක බලපු නැති එක හරි උවමනාවෙන් හරි එතන මේව වුණා. ඒකෙ මට වගකීමක් නැහැ කියන්නෙ නෑ,"
අමාත්‍ය කුමාර ජයකොඩි රූපවාහිනී වැඩසටහනකදී පැවසීය.
ඔහු එහිදී සඳහන් කළේ, තමන්ට එරෙහිව දේශපාලනික පළිගැනීමක් සිදුවූ බව ය.
අනුර සමග පැවති සබඳතාවල අතීතය
කුමාර ජයකොඩි ලංකා පොහොර සමාගමේ ප්‍රසම්පාදන සහ ආනයන අංශයේ කළමනාකාරවරයා ලෙස පත් කරන ලද්දේ, 2005 වසරේදී ය.
කුමාර ජයකොඩි පවසන්නේ, 2005 වසරේදී අනුර කුමාර දිසානායක කෘෂිකර්ම අමාත්‍ය ධූරයට පත්වීමෙන් පසු ඔහුගේ ඉල්ලීමක් මත එම තනතුර භාර ගත් බව ය.
එතැන් සිට 2015 වසර දක්වා ඔහු එම ධූරයේ සේවය කළේ ය.
මේ අතර, එල්ල වී ඇති චෝදනා පිළිබඳව විමර්ශන අවසන් වන තුරු අමාත්‍ය ධූරයෙන් සහ පාර්ලිමේන්තු මන්ත්‍රී ධූරයෙන් ඔහු ඉවත් විය යුතු බවට සමාජ මාධ්‍යවල අදහස් පළ වී තිබේ.
කුමාර ජයකොඩි යනු කවු ද?
1967 මැයි 26 වන දා උපත ලබා ඇති කුමාර ජයකොඩි ගම්පහ, ගෝතමී කනිෂ්ඨ විද්‍යාලයෙන් අධ්‍යාපනය ලබා පසුව, ඉංගිරිය ගාමිණී මධ්‍ය මහා විද්‍යාලයෙන් සහ මහනුවර කිංග්ස්වුඩ් විද්‍යාලයෙන් අධ්‍යාපනය ලබා තිබේ.
ඔහුගේ LinkedIn පිටුවෙහි සඳහන් කර ඇති පරිදි ඔහු පේරාදෙණිය විශ්වවිද්‍යාලයෙන් විදුලි සහ විද්‍යුත් ඉංජිනේරු විෂයෙහි ප්‍රථම උපාධිය ලබා තිබේ.
පාර්ලිමේන්තු නිල වෙබ් අඩවියේ (ඉංග්‍රීසි) දැක්වෙන පරිදි ඔහුගේ වෘත්තීය දේශපාලනය ඇරඹී ඇත්තේ, 1994 වසරේදී ය.
පසුව, ඔහු රාජ්‍ය සේවයේ කටයුතු කර ඇති අතර, 2005 වසරේ අනුර කුමාර දිසානායක කෘෂිකර්ම අමාත්‍ය ධූරය දැරූ සමයේ ඔහුගේ ඉල්ලීමකට අනුව, කුමාර ජයකොඩි ලංකා පොහොර සමාගමට අනුයුක්ත වී තිබේ.
2015 වසරේදී ඇති වූ ගැටලුව හේතුවෙන් ඔහු ඉන් ඉවත්වී තිබේ.
2024 නොවැම්බර් මාසයේදී ජාතික ජන බලවේගයේ ජාතික ලැයිස්තු මන්ත්‍රීවරයෙකු ලෙස ඔහු පාර්ලිමේන්තුවට ඇතුළු විය.
මේ වන විට ඔහු බලශක්ති අමාත්‍ය ධූරය හොබවයි.
@BBC sinhala
