ජාතික ජන බලවේගය විසින් ඉදිරිපත් කරන ලද මංගල අයවැයෙන් රාජ්‍ය සේවයේ වැටුප් වැඩි කිරීමක් සිදු කළද,
රජයේ සංවර්ධන ව්‍යාපෘතිවල සේවයේ නියුතු නිලධාරීන්ගේ වැටුප් සංශෝධනය මාස පහක් ගත වුවද තවමත් අනුමත වී නැත. මේ සම්බන්ධයෙන් විශ්ලේෂණය කිරීමේදී පැහැදිලි වන කරුණු කිහිපයක් වේ.
රාජ්‍ය සේවක වැටුප් වැඩිවීම
පසුගිය කාලයේ රටේ ආර්ථිකයේ ඇති වූ උස්පහත් වීම් සහ ජීවන වියදම ඉහළ යාම හේතුවෙන් රාජ්‍ය සේවකයන්ට ජීවත් වීමට සරිලන වැටුපක් ලබාදීම මෙම වැටුප් වැඩිවීමේ ප්‍රධාන අරමුණ විය. එමෙන්ම, මෙය වෙළඳපොළ ආර්ථිකයේ සචලතාව ප්‍රවර්ධනය කිරීමටද දායක වන බව රජය පෙන්වා දුන්නේය.
කෙසේ වෙතත්, රාජ්‍ය සේවයේ නිලධාරීන්ගේ වැටුප් වැඩිවීම සිදු වුවද, සංවර්ධන ව්‍යාපෘතිවලට අදාළ නිලධාරීන්ගේ වැටුප් සංශෝධනයක් අනුමත කිරීමට රජය අසමත් වී ඇත. මෙම ව්‍යාපෘති සඳහා විශේෂඥ දැනුම ඇති නිලධාරීන් මෙන්ම කාර්යාල කාර්ය මණ්ඩලද රාජ්‍ය සේවයෙන් සහ බාහිරින් බඳවා ගැනීම් සිදු කරයි.
වැටුප් සංශෝධනය ප්‍රමාද වීමට බලපෑ හේතු
1. මුදල් අමාත්‍යාංශයේ සහ බලධාරීන්ගේ අනුමැතිය ප්‍රමාදය:
මුදල් අමාත්‍යාංශ ආරංචි මාර්ගවලට අනුව, නව වැටුප් චක්‍රලේඛය අනුමත කිරීම මූලිකවම ප්‍රමාද වී ඇත්තේ මුදල් අමාත්‍යාංශයේ බලධාරීන්ගේ ක්‍රියාකාරීත්වය නිසයි. මීට මාසයකට වැඩි කාලයක් තිස්සේ මෙම නව චක්‍රලේඛය නියෝජ්‍ය අමාත්‍යවරයෙකු යටතේ රඳවාගෙන සිටින බව මාධ්‍ය වාර්තා පෙන්වා දෙයි.
2. අකාර්‍යක්ෂමතාව පිළිබඳ චෝදනා සහ ප්‍රතිවිරුද්ධ ක්‍රියා:
නව ආණ්ඩුව බලයට පත්වීමත් සමඟම රාජ්‍ය සේවය අකාර්‍යක්ෂම බවට දිගින් දිගටම චෝදනා කළද, මෙම වැටුප් වැඩි කිරීමේ අනුමැතිය ප්‍රමාද කිරීම රජයේ ප්‍රතිපත්ති සහ ක්‍රියාකාරීත්වයන් අතර ඇති වෙනසක් පෙන්වා දෙයි. විශේෂයෙන්ම, "ජනතාවාදී" යැයි කියන රජයක් කම්කරුවන්ට වගකිව යුතු බව පෙන්වුවද, වැටුප් වැඩිවීම අනුමත කිරීම ප්‍රමාද කිරීම මෙම ප්‍රතිපත්ති වලට පටහැනිය.
3. විශේෂඥ නිලධාරීන් රඳවා ගැනීමේ ගැටලුව:
දැනට සංවර්ධන ව්‍යාපෘතිවල සේවය කරන නිලධාරීන් සඳහා වැටුප් ගෙවනු ලබන්නේ MSD 01/2019 චක්‍රලේඛය පදනම් කරගෙනය. මෙම චක්‍රලේඛයේ සඳහන් වැටුප්, වත්මන් වෙළඳපොළ තත්ත්වය සහ ඉහළ ගිය ජීවන වියදමට සාපේක්ෂව ඉතා අඩු අගයක් ගනී. 2021 වසර පදනම් කර ගත් විට කොළඹ පාරිභෝගික මිල දර්ශකය ඒකක 94 කින් පමණ ඉහළ ගොස් ඇත. මේ හේතුවෙන්, බොහෝ විශේෂඥ නිලධාරීන් සේවය අතහැර යෑමට පෙළඹී ඇති අතර, නව බඳවා ගැනීම් සඳහා සුදුසුකම් සහිත අයදුම්කරුවන් සොයා ගැනීම අපහසු වී ඇත. මෙම තත්ත්වය, ව්‍යාපෘතිවල ප්‍රගතියට සෘජුවම බලපාන බැවින් ප්‍රමාද වීම තවදුරටත් ගැටළු උග්‍ර කරනු ඇත.
ප්‍රතිවිපාක සහ ඉදිරි අභියෝග
මෙම තත්ත්වය යටතේ, රජය විසින් වසර සඳහා වෙන් කරන ලද ප්‍රාග්ධන වියදම් පවා නිසි පරිදි වියදම් කර ගැනීමට නොහැකි වීමේ අවදානමක් පවතී. සංවර්ධන ව්‍යාපෘතිවල ප්‍රගතිය සඳහා අවශ්‍ය විශේෂඥ දැනුම හා සුදුසුකම් සහිත නිලධාරීන් නොමැති වීම මෙම තත්ත්වය වඩාත් භයානක කරනු ඇත.
මේ වන විට සේවයේ යෙදී සිටින නිලධාරීන්ගේ කලකිරීමද ඉහළ ගොස් ඇති අතර, එය ඔවුන්ගේ කාර්යක්ෂමතාවටද බලපායි. රජය විසින් වැටුප් සංශෝධනය කඩිනමින් අනුමත නොකළහොත්, සංවර්ධන ව්‍යාපෘති අකර්මණ්‍ය වීමටත්, එහි ප්‍රතිඵලයක් ලෙස රටේ ආර්ථික සංවර්ධන ඉලක්ක සපුරා ගැනීමට නොහැකි වීමටත් ඉඩ ඇත.
@දීප්ති අබේරත්න
