ලෝක කුසලාන අවසන් සටනට මෙසීගේ ආර්ජන්ටිනාව සහ ස්පාඤ්ඤය මුහුණට මුහුණ!

මෙසී සහ යමාල්

පාපන්දු ලෝකයේ දැවැන්ත කිරුළ වෙනුවෙන් පරම්පරා දෙකක ගැටුමක්

 

 

 

තම ලෝක කුසලාන පාපන්දු කිරුළ රැකගැනීමේ අරමුණින් පිටියට පිවිසෙන ලයනල් මෙසී ප්‍රමුඛ

ආර්ජන්ටිනා කණ්ඩායම, 2026 FIFA ලෝක කුසලාන අවසන් මහා තරගයේදී ප්‍රබල ස්පාඤ්ඤය සමඟ තරග වැදීමට නියමිතය. පාපන්දු ලෝකයේ දැවැන්තයින් දෙපිරිසක් අතර පැවැත්වෙන මෙම තරගය, ක්‍රීඩාවේ ඉහළම ත්‍යාගය වෙනුවෙන් සිදු කෙරෙන අතිශය තීරණාත්මක සටනක් වනු ඇත.

 

 

එංගලන්තයට එරෙහිව විශ්මිත ජයග්‍රහණයක් වාර්තා කරමින් ආර්ජන්ටිනාව පිට පිටම දෙවන වරටත් ලෝක කුසලාන අවසන් මහා තරගයට සුදුසුකම් ලබා ගත් අතර, ස්පාඤ්ඤය සිය අවසන් මහා තරග ස්ථානය වෙන් කර ගත්තේ ප්‍රංශය හමුවේ විශිෂ්ට ජයග්‍රහණයක් අත්කර ගනිමිනි.

 

මෙම අවසන් මහා තරගය ජූලි 20 වන සඳුදා නිව්යෝර්ක්-නිව්ජර්සි (New York-New Jersey) ක්‍රීඩාංගණයේදී ශ්‍රී ලංකා වේලාවෙන් අලුයම 12:30 ට (ඉරිදා රාත්‍රියේ) ආරම්භ වීමට නියමිතය.

 

 

2026 FIFA ලෝක කුසලාන අවසන් මහා තරගය

• තරගය: ස්පාඤ්ඤය  එදිරිව ආර්ජන්ටිනාව 

• ක්‍රීඩාංගණය: නිව්යෝර්ක්-නිව්ජර්සි ක්‍රීඩාංගණය

• තරගය ආරම්භය: ශ්‍රී ලංකා වේලාවෙන් අලුයම 12:30

 

 

ස්පාඤ්ඤයේ නැවත පැමිණීම 

2010 වසරේදී ලෝක කුසලානය දිනා ගැනීමෙන් පසු ස්පාඤ්ඤය මෙවර ඔවුන්ගේ පළමු ලෝක කුසලාන අවසන් මහා තරගයට පිවිසෙන්නේ ප්‍රංශයට එරෙහිව තරගාවලියේ ඔවුන්ගේ ප්‍රබලතම දස්කම් ප්‍රදර්ශනය කිරීමෙන් අනතුරුවය. ලුයිස් ද ලා ෆුවෙන්ටේගේ (Luis de la Fuente) කණ්ඩායම පන්දුව වැඩි කාලයක් සියතේ තබා ගනිමින් සහ විනයගරුක ආරක්ෂක උපක්‍රම භාවිත කරමින් අවසන් පූර්ව තරගය ජයග්‍රහණය කළේය.

 

ඔවුන් H කාණ්ඩයේ පෙරමුණ ගත්තේ තරමක් මන්දගාමී ආරම්භයකින් පසුව වුවද, ඉන් අනතුරුව සෞදි අරාබිය (4-0) සහ උරුගුවේ (1-0) පරාජය කිරීමට ඔවුන්ට හැකි විය. පිළිමළුන් පිටුදැකීමේ වටයේදී ඔස්ට්‍රියාව (3-0), පෘතුගාලය සහ බෙල්ජියම පරාජය කරමින් ස්පාඤ්ඤය මෙවර තරගාවලියේ විශිෂ්ටතම කණ්ඩායමක් ලෙස තම ස්ථානය තහවුරු කරගෙන ඇත.

 

 

මෙසී තවත් ලෝක කුසලානයක් පසුපස 

2022 කටාර් තරගාවලියේදී දිනාගත් කිරුළ ආරක්ෂා කර ගැනීමට උත්සාහ කරන ආර්ජන්ටිනාවේ ගමන දැඩි පීඩනයන් සහ අවසන් මොහොතේ පෙරළියන්ගෙන් පිරී පැවතුණි. කණ්ඩායමේ නායක ලියොනල් මෙසී 2026 ලෝක කුසලානයේදී මේ වන විට ගෝල 8ක් ලබාගෙන ඇති අතර, ඔහුගේ සමස්ත ලෝක කුසලාන ගෝල සංඛ්‍යාව 21ක් දක්වා ඉහළ නංවා ගෙන ඇත.

 

 

 

එංගලන්තයට එරෙහිව පැවති අවසන් පූර්ව තරගය පාපන්දු ලෝලීන්ට අමතක නොවන පෙරළියක් විය. ඇන්තනි ගෝර්ඩන්ගේ (Anthony Gordon) ගෝලයෙන් එංගලන්තය පෙරමුණ ගත් නමුත්, එන්සෝ ෆර්නැන්ඩස්ගේ (Enzo Fernandez) විශිෂ්ට දුරදිග පහරකින් සහ ලවුටාරෝ මාර්ටිනෙස්ගේ (Lautaro Martinez) අවසන් මොහොතේ හිසෙන් ලබාගත් ජයග්‍රාහී ගෝලයෙන් ආර්ජන්ටිනාව 2-1 ක තියුණු ජයග්‍රහණයක් වාර්තා කළේය. දැන් මෙසීට සිය පාපන්දු දිවියේ තවත් සදානුස්මරණීය ජයග්‍රහණයක් සඳහා ඇත්තේ එක් තරගයක් පමණි.

 

 

"පරාජය වුවද හිස කෙලින් තබාගන්න"

- එංගලන්තයට විලියම් කුමරුගෙන් සහ අගමැතිගෙන් ඇගයුම් 

 

 

 

ආර්ජන්ටිනාව හමුවේ ලැබූ 2-1 ක තියුණු පරාජය පිළිබඳව තමන් දැඩි කම්පනයට පත් වූ බව වේල්සයේ කුමරු (Prince of Wales) වන විලියම් කුමරු පවසයි. කෙන්සිංටන් මාලිගය විසින් නිකුත් කරන ලද ඔහුගේ නිවේදනයේ මෙසේ දැක්වේ.

 

"ඔබ පෙන්වූ සටන්කාමීත්වය සහ විශ්වාසය අප සැමට විශාල ආශ්වාදයක් ගෙන දුන්නා. මෙය තරගාවලියකදී මා දුටු පරිපූර්ණතම එංගලන්ත කණ්ඩායමයි. ඔබේ හිස කෙලින් තබාගන්න."

 

 

 

එංගලන්ත පාපන්දු සංගමයේ අනුශාසකයා ද වන විලියම් කුමරු, මෙම පණිවිඩය තමා පෞද්ගලිකවම නිකුත් කළ බව හැඟවීම සඳහා "W" අකුරින් ඊට අත්සන් තබා තිබුණි.

 

බ්‍රිතාන්‍ය අග්‍රාමාත්‍ය ශ්‍රීමත් කීර් ස්ටාමර් (Sir Keir Starmer) ද මෙම පරාජය ගැන සිය කනගාටුව පළ කරමින් කියා සිටියේ,

"කණ්ඩායමේ ලාංඡනය නියෝජනය කරමින් ඔවුන් පෙන්වූ ආශාව සහ ජවය අප සැමට ආඩම්බරයක්" බවයි.

බදාදා දිනයේදී අග්‍රාමාත්‍යවරයා ලෙස පාර්ලිමේන්තුව ඇමතූ අවස්ථාවේදී ද ඔහු එංගලන්ත කණ්ඩායමේ මෙම තීරණාත්මක තරගය පිළිබඳව සඳහන් කර තිබුණි.

 

මෙම තරගයේ පළමු අර්ධය ගෝල රහිතව අවසන් වූ අතර, 55 වැනි මිනිත්තුවේදී ඇන්තනි ගෝර්ඩන් එංගලන්තය වෙනුවෙන් ගෝලයක් වාර්තා කරමින් පෙරමුණ ගෙන දුන්නේය. එහෙත් අවසන් මොහොතේ ආර්ජන්ටිනාව ලබාගත් ගෝල දෙකෙන් එංගලන්තයේ ලෝක කුසලාන සිහිනය බොඳ වී ගියේය. ඇස්ටන් විලා පාපන්දු සමාජයේ දැඩි රසිකයෙකු ද වන විලියම් කුමරු,

"මෙම අතිවිශිෂ්ට තරගාවලිය වෙනුවෙන් පිටියේ සහ ඉන් පිටත සිටි සැමට ස්තූතියි,"

යනුවෙන්ද සිය නිවේදනයේ වැඩිදුරටත් සඳහන් කර ඇත.

 

 

පෙර ලෝක කුසලාන හමුවීම්

ස්පාඤ්ඤය සහ ආර්ජන්ටිනාව ලෝක කුසලාන ඉතිහාසයේ මුණගැසී ඇත්තේ එක් වරක් පමණි. ඒ 1966 වසරේදී ආර්ජන්ටිනාව 2-1 ක් ලෙස ස්පාඤ්ඤය පරාජය කළ තරගයේදීය. කෙසේ වෙතත්, කණ්ඩායම් දෙක අතර පැවති මිත්‍රශීලී තරග 13න් 6ක් ස්පාඤ්ඤයද, 5ක් ආර්ජන්ටිනාවද ජයගෙන ඇත. 2018 වසරේ පැවති ඔවුන්ගේ මෑතම තරගයෙන් ස්පාඤ්ඤය 6-1 ක දැවැන්ත ජයක් ලැබීමට සමත් විය.

 

 

විය හැකි ආරම්භක කණ්ඩායම් (Starting Line-ups)

ස්පාඤ්ඤය: Simon; Porro, Laporte, Cubarsi, Cucurella; Rodri, Fabian; Lamine Yamal, Olmo, Baena; Oyarzabal.

ආර්ජන්ටිනාව: Martinez; Nahuel, Romero, Lisandro Martinez, Tagliafico; Paredes, Mac Allister, Enzo Fernandez, Giuliano Simeone; Messi, Julian Alvarez.