තොරතුරු දැනගැනීමේ අයිතිවාසිකම් පනත යටතේ රහස්‍යතා ගැටළු උපුටා දක්වමින්
ජනාධිපති ලේකම් කාර්යාලය ජනාධිපති මාධ්‍ය අංශයට අනුයුක්ත නිලධාරීන්ගේ නම් හෙළි කිරීම ප්‍රතික්ෂේප කර ඇති බව වාර්තා වේ.
නීති ශිෂ්‍යයෙකු සහ ක්‍රියාකාරිකයෙකු වන අනුරුද්ධ බණ්ඩාර විසින් ගොනු කරන ලද තොරතුරු ඉල්ලීමක අභියාචනයකට ප්‍රතිචාර වශයෙන්, ජනාධිපති ජ්‍යෙෂ්ඨ සහකාර ලේකම් ජී.පී.එච්.එම්. කුමාරසිංහ ලිඛිතව ප්‍රකාශ කර ඇත්තේ එම පුද්ගල නාම 2016 අංක 12 දරන තොරතරු පනත යටතේ ආරක්ෂා කර ඇති පුද්ගලික තොරතුරු බවයි.
ඔහුගේ තොරතුරු ඉල්ලීමට මුලින් ප්‍රතිචාරයක් නොලැබීමෙන් පසු, බණ්ඩාර අභියාචනයක් ගොනු කළේය. නිල පිළිතුරේ දී, බලයලත් නිලධාරියා වෙනුවෙන් කුමාරසිංහ, තොරතුරු නිකුත් නොකරන බව නැවත අවධාරණය කර තිබේ.
තොරතුරු පනතේ 5(1)(අ) වගන්තිය යටතේ ප්‍රතික්ෂේප කිරීම සිදු කර ඇත. එහි සඳහන් වන්නේ මහජන ක්‍රියාකාරකම් හෝ අවශ්‍යතාවලට අදාළත්වයක් නොමැති නම් හෝ එහි හෙළිදරව් කිරීම අනවශ්‍ය ලෙස පෞද්ගලිකත්වය ආක්‍රමණය කිරීමට හේතු වේ නම් – විශාල මහජන උනන්දුවක් හෙළිදරව් කිරීම මගින් සාධාරණීකරණය නොකරන්නේ නම් හෝ පුද්ගලයා ලිඛිත කැමැත්තක් ලබා දී නොමැති නම් – පුද්ගලික තොරතුරු වෙත ප්‍රවේශය ප්‍රතික්ෂේප කළ හැකි බවයි.
කෙසේ වෙතත්, නීතිමය පූර්වාදර්ශය වෙනස් අර්ථකථනයක් යෝජනා කරයි. අභියාචනාධිකරණය මීට පෙර ප්‍රකාශ කර ඇත්තේ කිසිදු රාජ්‍ය ආයතනයකට “පුද්ගලික තොරතුරු” ලෙස සඳහන් කිරීමෙන් මහජන අරමුදල් භාවිතය පිළිබඳ තොරතුරු රඳවා ගත නොහැකි බවය.
එවැනි තොරතුරු මහජන පරීක්ෂාවට යටත් වන අතර, අර්ධ අධිකරණ බලතල සහිත අධිකාරියක් වන තොරතුරු කොමිෂන් සභා නියෝගයකට අනුකූල වීමට අපොහොසත් වීම යහපත් විශ්වාසයකින් යුත් ක්‍රියාවක් ලෙස සාධාරණීකරණය කළ නොහැකි බව අධිකරණය තීන්දු කරන ලදී.
නිශ්චිත තොරතුරු නිකුත් කිරීම සඳහා නියෝග කරන තොරතුරු කොමිෂන් සභා නියෝග අවලංගු කිරීමට උත්සාහ කළ ශ්‍රී ලංකා ටෙලිකොම් (SLT) විසින් ගොනු කරන ලද පෙත්සම් තුනක් සම්බන්ධයෙන් මෑතදී මෙම තීන්දුව ලබා දෙන ලදී.
ටෙලිකොම් ආයතනය එහිදී තොරතුරු කොමිසම සහ හිටපු නියෝජ්‍ය සාමාන්‍යාධිකාරීවරුන් දෙදෙනෙකු වන G. සුරේන්ද්‍ර සහ D.J. විජේවර්ධන වගඋත්තරකරුවන් ලෙස නම් කළේය.
අභියාචනාධිකරණය කොමිසමේ තීරණ තහවුරු කළ අතර තොරතුරු හෙළි කරන ලෙස ටෙලිකොම් ආයතනයට නියෝග කළේය. රාජ්‍ය ආයතන සහ නිලධාරීන් විනිවිදභාවය සහ වගවීම ආරක්ෂා කිරීමට බැඳී සිටින බව, විශේෂයෙන් මහජන අරමුදල් සම්බන්ධ වන විට, අවධාරණය කළේය.
දැන් ජාතික ජන බලවේග ආණ්ඩුව තීරණය කර ඇත්තේ එම අභිචනාධිකරණ තීන්දුව නොසළකා සිය ජනාධිපතිවරයාගේ මාධ්‍ය කණ්ඩායමක කව්රුන්දයි ප්‍රසිද්ධ නොකිරීමටය.
මෙය අධිකරණය හමු‌වේ පරාජය වීමට නියමිත දොස් සහිත තීරණයකි.
ජනාධිපති ලේකම් කාර්යාලය විසින් ගන්නා ලද ස්ථාවරය දැනටමත් විවේචනයට ලක්ව තිබේ. විශේෂයෙන් තොරතුරු දැනගැනීමේ අයිතිවාසිකම් කොමිසම මාස තුනකට වැඩි කාලයක් සභාපතිවරයෙකු නොමැතිව සිටින අවස්ථාවක. මාර්තු 6 වන දින හිටපු ශ්‍රේෂ්ඨාධිකරණ විනිසුරු උපාලි අබේරත්න ඉල්ලා අස්වීමෙන් පසු මෙම පුරප්පාඩුව ඇති විය.
අබේරත්න මහතා ඉල්ලා අස්වීමට පෙර, හිටපු අභියාචනාධිකරණ විනිසුරු රෝහිණී වල්ගම ද කොමිසමේ සාමාජිකාවක් ලෙස ඉල්ලා අස්විය. මැයි මාසයේදී, මාධ්‍ය සංවිධාන විසින් නම් කරන ලද විශ්‍රාමික අභියාචනාධිකරණ විනිසුරු වන ඩී.එන්. සමරකෝන් ආණ්ඩුක්‍රම ව්‍යවස්ථා සභාවේ අනුමැතියෙන් පසුව කොමිසමට පත් කරන ලදී. කෙසේ වෙතත්, ඔහු තවමත් සභාපති ධුරයට පත් කර නොමැත.
ආණ්ඩුක්‍රම ව්‍යවස්ථා සභාව අප්‍රේල් 1 වන දින වන විට පුරප්පාඩු වූ සභාපති ධුරය පිරවීම සඳහා නාමයෝජනා කැඳවූ නමුත් මේ දක්වා කිසිදු පත්වීමක් සිදු කර නොමැත.
තොරතුරු කොමිසමේ සභාපති ලෙස නිමල් බෝපගේ නම් දූෂණ චෝදනා ලද පුද්ගලයකු පත් කිරීමට යන්නේ යැයි පවතින ආරංචි තවම ආණ්ඩුව ප්‍රතික්ෂේප කර නැත.
(බිඟුන් මේනක ගමගේ සහ අංජලී විතානගේ විසින් සිලෝන් ටුඩේ පුවත්පතට ලියූ වාර්තාවක කරුණූද ඇසුරිණි.)
@srilankabrief
